മംഗളൂരു: ലഗേജുകള്‍ എത്തിക്കാതെ വിമാനക്കമ്പനികള്‍ ഗള്‍ഫ് യാത്രികരെ ദുരിതത്തിലാക്കുന്നു. കഴിഞ്ഞ ദിവസം എയര്‍ ഇന്ത്യാ എക്‌സ്പ്രസ്, ജെറ്റ് എയര്‍വേയ്‌സ് വിമാനങ്ങളില്‍ മംഗളൂരുവിലെത്തിയ ഗള്‍ഫ് യാത്രക്കാരുടെ ലഗേജുകളാണ് ലഭിക്കാതിരുന്നത്. ലഗേജുകള്‍ ഇനി എപ്പോഴാണ് എത്തുകയെന്ന കാര്യത്തില്‍ ബന്ധപ്പെട്ട അധികൃതര്‍ക്കും വ്യക്തതയില്ല.
കഴിഞ്ഞ ദിവസം അബുദബിയില്‍ നിന്ന് 180 യാത്രക്കാരെയും വഹിച്ച് മംഗളൂരുവിലെത്തിയ ജെറ്റ് എയര്‍വേസ് വിമാനങ്ങളിലെ നൂറിലധികം യാത്രക്കാരുടെ ലഗേജുകള്‍ ലഭിച്ചില്ല. ദുബൈയില്‍ നിന്നെത്തിയ മറ്റു വിമാനങ്ങളിലെ യാത്രക്കാരുടെ സ്ഥിതിയും ഇതു തന്നെയായിരുന്നു. ഗള്‍ഫില്‍ പെരുന്നാള്‍ അവധി ആരംഭിച്ചതോടെ വിമാനങ്ങളില്‍ യാത്രക്കാരുടെ തിരക്കാണ്.
ലഗേജുകള്‍ വിമാനത്തില്‍ കയറ്റിയെന്ന് ഉറപ്പ് വരുത്തിയ ശേഷമാണ് യാത്രക്കാര്‍ വിമാനം കയറുന്നത്. എന്നാല്‍ ഭാരം കൂടുന്നതിനാല്‍ യാത്രക്കാരെ കയറ്റിയ ശേഷം അവരുടെ ലഗേജുകള്‍ ഇറക്കി വച്ചാണ് വിമാനങ്ങള്‍ അബുദബിയില്‍ നിന്നും ദുബൈയില്‍ നിന്നും പുറപ്പെടുന്നതെന്നും ഇവിടെയെത്തിയ ശേഷമാണ് ലഗേജുകള്‍ നഷ്ടപ്പെട്ട വിവരം അറിയുന്നതെന്നും യാത്രക്കാര്‍ പറയുന്നു.