കാസര്‍കോട്: നഗരത്തിലെ ഹോട്ടലില്‍ ഹെല്‍മറ്റ് ധരിച്ചെത്തി അരലക്ഷം രൂപ കവര്‍ന്ന കേസില്‍ യുവാവ് അറസ്റ്റില്‍. നെല്ലിക്കട്ട, പാലത്തടുക്ക ലക്ഷം വീട് കോളനിയിലെ പി.എം നവാസ് എന്ന കേഡി നവാസി(36)നെയാണ് പഴയ ബസ് സ്റ്റാന്‍ഡ് പരിസരത്തു വച്ച് ടൗണ്‍ എസ്.ഐ അജിത്ത് കുമാര്‍ അറസ്റ്റു ചെയ്തത്. ഇയാള്‍ നേരത്തെ ഏതാനും മോഷണ കേസുകളില്‍ പ്രതിയാണെന്ന് പൊലിസ് പറഞ്ഞു. ഇക്കഴിഞ്ഞ ഏപ്രില്‍ നാലിനാണ് കേസിനാസ്പദമായ സംഭവം. പഴയ ബസ് സ്റ്റാന്‍ഡ് പരിസരത്തെ സാഗര്‍ ഹോട്ടലിലാണ് കവര്‍ച്ച നടന്നത്. ഹോട്ടലിനു മുന്നില്‍ സ്ഥാപിച്ചിട്ടുള്ള സി.സി.ടി.വി കാമറയില്‍ പതിഞ്ഞ ദൃശ്യത്തില്‍ നിന്നാണ് മോഷ്ടാവിനെ തിരിച്ചറിഞ്ഞത്.