പ്രതിസന്ധികളെ അതിജീവിച്ചാണ് ജില്ലാ പഞ്ചായത്ത് പദ്ധതി നിര്‍വഹണത്തില്‍ മുന്നേറിയത്
കാസര്‍കോട്: 2016-17 സാമ്പത്തിക വര്‍ഷത്തെ ജനകീയാസൂത്രണ പദ്ധതി പ്രവര്‍ത്തനങ്ങളില്‍ കാസര്‍കോട് ജില്ലാ പഞ്ചായത്തിനും നീലേശ്വരം ബ്ലോക്ക് പഞ്ചായത്തിനും അഭിമാനമുഹൂര്‍ത്തം. ജില്ലയിലെ തദ്ദേശഭരണ സ്ഥാപനങ്ങളും പദ്ധതി നിര്‍വഹണത്തില്‍ മികച്ച നേട്ടം കൈവരിച്ചു.
പദ്ധതി അടങ്കലിന്റെ 85.33 ശതമാനം തുക ചെലവഴിച്ച് കാസര്‍കോട് ജില്ലാ പഞ്ചായത്ത് സംസ്ഥാന തലത്തില്‍ ഒന്നാം സ്ഥാനത്തെത്തി. ജീവനക്കാരുടെ അഭാവം മൂലം പ്രതിസന്ധിയിലായിരുന്ന ജില്ലാ പഞ്ചായത്ത് പ്രതിസന്ധികളെ അതിജീവിച്ചാണു പദ്ധതി നിര്‍വഹണത്തില്‍ മുന്നേറിയത്. ബ്ലോക്ക് പഞ്ചായത്തുകളില്‍, സംസ്ഥാനതലത്തില്‍ ആദ്യമായി 100 ശതമാനം പദ്ധതി തുക ചെലവഴിച്ചു ജില്ലയിലെ നീലേശ്വരം ബ്ലോക്ക് പഞ്ചായത്തും ഒന്നാം സ്ഥാനം കരസ്ഥമാക്കിയതായി ജില്ലാ ആസൂത്രണ സമിതി മെമ്പര്‍ സെക്രട്ടറികൂടിയായ കലക്ടര്‍ അറിയിച്ചു.
82 ശതമാനം തുക ചെലവഴിച്ച പരപ്പ ബ്ലോക്ക് പഞ്ചായത്തും മികച്ച പ്രകടനമാണ് കാഴ്ചവച്ചത്. ഗ്രാമ പഞ്ചായത്തുകളില്‍ 97.37 ശതമാനം തുക ചെലവഴിച്ച് കിനാനൂര്‍-കരിന്തളം ഗ്രാമ പഞ്ചായത്ത് ജില്ലയില്‍ ഒന്നാം സ്ഥാനത്താണ്. മടിക്കൈ, ചെറുവത്തൂര്‍, ചെങ്കള എന്നീ ഗ്രാമ പഞ്ചായത്തുകള്‍ യഥാക്രമം പദ്ധതി തുകയുടെ 94, 92, 90 ശതമാനം തുക ചെലവഴിച്ചു. നഗരസഭകളില്‍ 73 ശതമാനം തുക ചെലവഴിച്ച് നീലേശ്വരം മുനിസിപ്പാലിറ്റിയാണ് പദ്ധതിച്ചെലവില്‍ മുന്നിട്ടു നില്‍ക്കുന്നത്.
നിര്‍വഹണ ഉദ്യോഗസ്ഥരുടെ അഭാവം പദ്ധതി നിര്‍വഹണത്തെ പ്രതികൂലമായി ബാധിക്കുന്നതിനിടയിലാണ് പരിമിതികള്‍ക്കുള്ളില്‍ നിന്നുകൊണ്ട് ജില്ലയിലെ തദ്ദേശ ഭരണ സ്ഥാപനങ്ങള്‍ ഈ നേട്ടം കൈവരിച്ചത്.