ലിയോണ്‍ (മെക്‌സിക്കോ): ഇന്ത്യന്‍ വെറ്ററന്‍ ടെന്നീസ് ഇതിഹാസം ലിയാണ്ടര്‍ പെയ്‌സ് സീസണിലെ ആദ്യ ഡബിള്‍സ് കിരീടത്തിനു തൊട്ടരികില്‍. മെക്‌സിക്കോയിലെ ലിയോണില്‍ നടക്കുന്ന ചാലഞ്ചര്‍ ടൂര്‍ ടെന്നീസ് ടൂര്‍ണമെന്റിന്റെ പുരുഷ ഡബിള്‍സ് ഫൈനലിലേക്കു മുന്നേറിയാണു പെയ്‌സ് കിരീട പ്രതീക്ഷ നിലനിര്‍ത്തിയത്.
പെയ്‌സും കാനഡയുടെ ആദില്‍ ഷംസ്ദിനുമടങ്ങിയ സഖ്യം ആസ്‌ത്രേലിയയുടെ ലുക് സവില്ലെ- ജോണ്‍ പാട്രിക്ക് സ്മിത്ത് സഖ്യത്തെ കീഴടക്കി.
കടുത്ത പോരാട്ടം അതിജീവിച്ച ഇന്തോ- കനേഡിയന്‍ സഖ്യം 6-7 (1), 6-4, 10-5 എന്ന സ്‌കോറിനാണു വിജയിച്ചത്. ഫൈനലില്‍ സ്വിറ്റ്‌സര്‍ലന്‍ഡ് താരം ലുക്ക മാര്‍ഗ്രോലിയും ബ്രസീലിന്റെ കാരോ സംപിയേരിയുമടങ്ങിയ സഖ്യമാണു പെയ്‌സ്- ഷംസ്ദിന്‍ സഖ്യത്തിന്റെ എതിരാളികള്‍.