സ്വന്തം ലേഖകന്‍
തിരുവനന്തപുരം: സംസ്ഥാനത്ത് ലോക്ക് ഡൗണ്‍ ലംഘിച്ച് നിരത്തിലിറങ്ങുന്നവരെ കുടുക്കാന്‍ മൊബൈല്‍ അപ്ലിക്കേഷനുമായി പൊലിസ്. വര്‍ക്കല പൊലിസ് രംഗത്തിറക്കിയ റോഡ് വിജില്‍ എന്ന മൊബൈല്‍ അപ്ലിക്കേഷന്‍ സംസ്ഥാനവ്യാപകമായി നടപ്പാക്കാനാണ് ആലോചന. നിലവില്‍ തിരുവനന്തപുരം ജില്ലയില്‍ നടപ്പാക്കി തുടങ്ങിയിട്ടുണ്ട്.
നിരത്തിലിറങ്ങുന്നവരോട് പൊലിസ് മോശമായി പെരുമാറി, അടിയന്തര ആവശ്യക്കാരെ കടത്തിവിട്ടില്ല തുടങ്ങിയ പരാതികള്‍ മൊബൈല്‍ അപ്ലിക്കേഷന്‍ രംഗത്തിറക്കുന്നതോടെ കുറയുമെന്നാണ് ഉന്നതാധികാരികളുടെ പ്രതീക്ഷ.
വാഹനവുമായി എത്തുന്നയാളോട് യാത്രാവിവരം അന്വേഷിച്ച് വാഹനത്തിന്റെ നമ്പര്‍ ഉള്‍പ്പെടെ രേഖപ്പെടുത്തും.
ഇത് മറ്റിടങ്ങളിലെ പൊലിസുകാര്‍ക്ക് ലഭ്യമാകുമെന്നതിനാല്‍ ഇല്ലാത്ത കാരണം പറഞ്ഞു പറ്റിച്ചു റൂട്ട് മാറി പോകുന്നവര്‍ അപ്പോള്‍ തന്നെ പിടിക്കപ്പെടും. ഒരുദിവസം ഈ വാഹനം എപ്പോഴൊക്കെ നിരത്തിലിറങ്ങി, എങ്ങോട്ടൊക്കെ പോയി തുടങ്ങിയ വിവരങ്ങളും അപ്ലിക്കേഷനില്‍ ലഭ്യമാകും. അനാവശ്യമായി വാഹനം എടുത്ത് പുറത്തിറങ്ങുന്നവര്‍ക്കും പൊലിസിനെ കബളിപ്പിക്കുന്നവര്‍ക്കുമെതിരേ ഉടന്‍ അറസ്റ്റ് ഉള്‍പ്പടെയുള്ള നടപടികളുമുണ്ടാകും.
സത്യവാങ്മൂലത്തിനു പുറമേ ഓണ്‍ലൈന്‍ പാസും ലഭ്യമാക്കിയിട്ടും നിരത്തിലെ പറ്റിക്കലിനും പൊലിസിന് എതിരായ പരാതികള്‍ക്കും കുറവില്ലാത്ത സാഹചര്യത്തിലാണ് വര്‍ക്കല പൊലിസ് പരീക്ഷിച്ചു വിജയിച്ച മൊബൈല്‍ അപ്ലിക്കേഷന്‍ സംസ്ഥാന വ്യാപകമാക്കാന്‍ ആലോചിക്കുന്നത്.