കണ്ണൂര്‍: ബി.എസ്.എന്‍.എല്‍ പ്രീപെയ്ഡ് മൊബൈല്‍ ഉപഭോക്താക്കള്‍ക്ക് സഊദി, യു.എ.ഇ, ഒമാന്‍, മ്യാന്‍മര്‍, നേപ്പാള്‍, യു.എസ് എന്നീ രാജ്യങ്ങളില്‍ ഇന്റര്‍നാഷനല്‍ റോമിങ് സൗകര്യം ലഭ്യമായിത്തുടങ്ങി. നിലവിലുള്ള പ്രീപെയ്ഡ് പ്ലാനില്‍ തുടര്‍ന്നു തന്നെ ഈ സൗകര്യം ഉപയോഗപ്പെടുത്താം.
ഇതിനായി നിലവിലെ പ്രീപെയ്ഡ് സിംകാര്‍ഡ് മാറ്റി 10 രൂപ മാത്രം നിരക്കുള്ള പുതിയ ഡ്യുയല്‍ ഇംസി സിംലെസ് റോമിങ് സിം കാര്‍ഡ് ഉപയോഗിക്കണം. ആധാര്‍ നമ്പര്‍ സഹിതം ബി.എസ്.എന്‍.എല്‍ കസ്റ്റമര്‍ സര്‍വിസ് സെന്ററില്‍ എത്തിയാല്‍ ഈ സിം കാര്‍ഡ് ലഭിക്കും.
തിരികെ എത്തിയാലും ഈ സിം കാര്‍ഡ് മാറ്റാതെ ഉപഭോക്താക്കള്‍ക്ക് നിലവിലുള്ള പ്ലാനില്‍ തുടര്‍ന്ന് ഉപയോഗിക്കാം.
ബാങ്കുകളില്‍ നിന്ന് ആധാറുമായി ലിങ്ക് ചെയ്ത് സര്‍ക്കാര്‍ സ്ഥാപനങ്ങളില്‍ നിന്നും മറ്റും ലഭിക്കുന്ന ഇന്‍കമിങ് എസ്.എം.എസ് സൗജന്യമായും കുറഞ്ഞ നിരക്കില്‍ വോയ്‌സ് കോളുകളും ഉപഭോക്താക്കള്‍ക്കു ലഭിക്കും.
പ്രീപെയ്ഡ് മെയിന്‍ അക്കൗണ്ടില്‍ ആവശ്യമായ ബാലന്‍സ് ഉണ്ടെന്ന് ഉപഭോക്താക്കള്‍ ഉറപ്പുവരുത്തണമെന്ന് ബി.എസ്.എന്‍.എല്‍ അറിയിച്ചു.