തിരുവനന്തപുരം: റേഷന്‍ കാര്‍ഡില്ലാതെ സത്യവാങ്മൂലം നല്‍കി റേഷന്‍ വാങ്ങുന്നതില്‍ തട്ടിപ്പ് നടത്തുന്നവര്‍ക്കെതിരേ കര്‍ശന നടപടിയെടുക്കുമെന്ന് ഭക്ഷ്യ മന്ത്രി പി. തിലോത്തമന്‍. 

ഭക്ഷ്യ സെക്രട്ടറിയുമായി നടത്തിയ വിഡിയോ കോണ്‍ഫറന്‍സില്‍ മന്ത്രി ഇതിനാവശ്യമായ നടപടികള്‍ സ്വീകരിക്കാന്‍ നിര്‍ദേശം നല്‍കി. 

സത്യവാങ്മൂലം നല്‍കി റേഷന്‍ വാങ്ങുന്നവരുടെ ആധാര്‍ അടക്കമുള്ള വിവരങ്ങള്‍ എക്‌സല്‍ ഷീറ്റില്‍ തയാറാക്കി ഇരട്ടിപ്പുണ്ടെങ്കില്‍ അത്തരക്കാര്‍ക്കെതിരേ നടപടിയെടുക്കും. 

സൗജന്യ റേഷന്‍ വിതരണത്തില്‍ റേഷന്‍ കടകളില്‍ അളവിലും തൂക്കത്തിലും തട്ടിപ്പ് നടത്തുന്നതായി ആക്ഷേപമുയര്‍ന്ന സാഹചര്യത്തില്‍ അന്വേഷണത്തിന് വിജിലന്‍സിനെ ചുമതലപ്പെടുത്തിയെന്നും മന്ത്രി അറിയിച്ചു.

റേഷന്‍ കാര്‍ഡില്ലാത്തവര്‍ക്ക് ആളെണ്ണ ക്രമത്തില്‍ ഒരാള്‍ക്ക് 5 കിലോ, 2 പേര്‍ക്ക് 10 കിലോ, അതില്‍ കൂടുതലുള്ളവര്‍ക്ക് 15 കിലോ വരെയും അരി സൗജന്യ റേഷന്‍ അനുവദിക്കാമെന്നും മന്ത്രി നിര്‍ദേശം നല്‍കി. 

റേഷന്‍ കടകള്‍ വഴിയുള്ള സൗജന്യ കിറ്റ് വിതരണം ഇപോസ് പ്രകാരമായിരിക്കും നടത്തുക. ഇന്ന് എസ്.ടി വിഭാഗത്തിനും എ.എ.വൈ കാര്‍ഡ് ഉടമകള്‍ക്കും 11ന് എ.എ.വൈ ഇതര കാര്‍ഡുകാര്‍ക്കും സൗജന്യ കിറ്റ് വിതരണം നടത്തും. വിതരണത്തിനായുള്ള കിറ്റ് സപ്ലൈകോ ഔട്ട് ലെറ്റുകളില്‍ തയാറാക്കിക്കഴിഞ്ഞെന്നും ഇത് റേഷന്‍ കടകളില്‍ കൃത്യമായ രസീത് നല്‍കി ഏല്‍പ്പിക്കുമെന്നും മന്ത്രി അറിയിച്ചു.