തൃശൂര്‍: പട്ടികജാതി വികസന വകുപ്പിന് കീഴില്‍ പാലക്കാട്ടെ കുഴല്‍മന്ദത്ത് പ്രവര്‍ത്തിക്കുന്ന ഗവ. പ്രീ എക്‌സാമിനേഷന്‍ പരിശീലന കേന്ദ്രത്തില്‍ പട്ടികജാതി-പട്ടികവര്‍ഗ, ഒ.ബി.സി. വിഭാഗങ്ങളില്‍പ്പെട്ട വിദ്യാര്‍ഥികള്‍ക്ക് മെഡിക്കല്‍-എഞ്ചിനിയറിങ് പ്രവേശന പരീക്ഷയ്ക്ക് സൗജന്യ പരിശീലനം നല്‍കുന്നു. ഈ വര്‍ഷം പ്ലസ്സ് വണ്ണിന് പഠിക്കുന്ന കുട്ടികളെ 2018 ലെ പ്രവേശന പരീക്ഷയ്ക്കായി പരിശീലിപ്പിക്കുന്നതിനാണ് പരിപാടി.
വാരാന്ത്യ അവധി ദിവസങ്ങളിലായിരിക്കും പരിശീലനം. പ്രവേശനം തേടുന്ന ഒ.ബി.സി. വിഭാഗക്കാരുടെ വാര്‍ഷിക വരുമാനം ഒരു ലക്ഷം രൂപയില്‍ താഴെയായിരിക്കണം. 30 ശതമാനം സീറ്റുകള്‍ ഈ വിഭാഗക്കാര്‍ക്കായി മാറ്റി വച്ചിട്ടുണ്ട്. താല്‍പ്പര്യമുളളവര്‍ ജാതി സര്‍ട്ടിഫിക്കറ്റിന്റെ സ്വയം സാക്ഷ്യപ്പെടുത്തിയ പകര്‍പ്പുകളും സ്ഥാപന മേധാവി സാക്ഷ്യപ്പെടുത്തിയ എസ്.എസ്.എല്‍.സി. സര്‍ട്ടിഫിക്കറ്റിന്റെ പകര്‍പ്പും പാസ്‌പോര്‍ട്ട് സൈസ് ഫോട്ടോയും സ്ഥാപന മേധാവിയുടെ സാക്ഷ്യപത്രവും സഹിതം ജൂലൈ 12 നകം പരിശീലന കേന്ദ്രത്തില്‍ അപേക്ഷ സമര്‍പ്പിക്കണം. ഒ.ബി.സി. വിഭാഗക്കാര്‍ വരുമാന സര്‍ട്ടിഫിക്കറ്റിന്റെ സ്വയം സാക്ഷ്യപ്പെടുത്തിയ പകര്‍പ്പും നല്‍കണം.
അപേക്ഷയുടെ മാതൃക പരിശീലന കേന്ദ്രത്തിലും ജില്ലാ ബ്ലോക്ക് മുനിസിപ്പല്‍ പട്ടികജാതി വികസന ഓഫിസുകളിലും ലഭിക്കും. വിശദവിവരങ്ങള്‍ പ്രിന്‍സിപ്പാള്‍, ഗവ. പ്രീ-എക്‌സാമിനേഷന്‍ ട്രെയിനിങ് സെന്റര്‍, ഇ.പി. ടവര്‍, രണ്ടാം നില, ചന്തപ്പുര, കുഴല്‍മന്ദം, പാലക്കാട്-678 702 എന്ന വിലാസത്തിലോ 04922 273777 എന്ന ഫോണ്‍ നമ്പറിലോ ലഭിക്കും.