മാള: പ്രാഥമികാവശ്യത്തിന് പോലും വെള്ളം ഇല്ലാത്തതിനാല്‍ മാള മിനി സിവില്‍ സ്‌റ്റേഷന്റെ പ്രവര്‍ത്തനം അവതാളത്തിലേക്ക്. മിനി സിവില്‍ സ്‌റ്റേഷനില്‍ ആറ് ഓഫിസുകളാണ് പ്രവര്‍ത്തിക്കുന്നത്. കൂടാതെ ഇതേ സ്ഥലത്ത് പ്രവര്‍ത്തിക്കുന്ന മാള എക്‌സൈസ് റേഞ്ച് ഓഫിസിന്റെ പ്രവര്‍ത്തനത്തേയും ജലക്ഷാമം ബാധിച്ചിട്ടുണ്ട്. സിവില്‍ സ്‌റ്റേഷന്‍ സ്ഥലത്തുള്ള കിണറില്‍ നിന്നാണ് വെള്ളം പമ്പ് ചെയ്തിരുന്നത്. ഈ കിണറിലെ വെള്ളം ഇപ്പോള്‍ ഒരു ഓഫിസിന്റെ പ്രവര്‍ത്തനത്തിന് പോലും തികയാത്ത അവസ്ഥയിലാണ്. സിവില്‍ സ്‌റ്റേഷനിലേക്കും എക്‌സൈസ് ഓഫിസിലേക്കും ഇപ്പോള്‍ രാവിലെ ഒരു മണിക്കൂര്‍ സമയത്തേക്കുള്ള വെള്ളം മാത്രമാണ് കിണറില്‍ നിന്ന് ലഭിക്കുന്നത്. ജലനിധി പദ്ധതിയുടെ ഭാഗമായി മിനി സിവില്‍ സ്‌റ്റേഷനിലേക്ക് കുടിവെള്ള കണക്ഷന്‍ എടുത്തിട്ടുണ്ടെങ്കിലും വെള്ളം ലഭിച്ചിട്ടില്ല.