തൊടുപുഴ: കൊവിഡ് 19 ബാധിച്ച് ഇടുക്കിയില്‍ ചികിത്സയിലിരുന്ന നാല് പേര്‍ കൂടി രോഗവിമുക്തരായി, രണ്ട് പേര്‍ ആശുപത്രി വിട്ടു. ഇതോടെ ജില്ലയിലെ രോഗ ബാധിതരുടെ എണ്ണം മൂന്നായി ചുരുങ്ങി. ഇടുക്കിയില്‍ മൂന്നാമതായി രോഗം സ്ഥിരീകരിച്ച പൊതുപ്രവര്‍ത്തകനായ എ.പി. ഉസ്മാനുമായി നേരിട്ട് സമ്പര്‍ക്കം പുലര്‍ത്തിയിരുന്ന ചുരുളി സ്വദേശിയായ തയ്യല്‍കാരനും ബൈസണ്‍വാലിയിലെ ഏകാധ്യാപികയുമാണ് ബുധനാഴ്ച രോഗമുക്തി നേടിയത്. പിന്നാലെ ഇന്നലെ അധ്യാപികയുടെ ഏഴ് വയസുള്ള മകന്റേയും ചുരുളി സ്വദേശിയുടെ ഭാര്യയുടേയും ഫലവും നെഗറ്റീവായി. അധ്യാപികയും മകനും ഇന്നലെ വൈകിട്ടോടെ ഇടുക്കി ജില്ലാ ആശുപത്രി വിട്ടു. ഇവര്‍ 14 ദിവസം വീട്ടില്‍ ക്വാറന്റൈനില്‍ തുടരും.
ചുരുളി സ്വദേശിയുടെ 10 വയസുള്ള മകനും 70 വയസുള്ള അമ്മയും ആശുപത്രിയില്‍ ചികിത്സയിലുണ്ട്. ഇവരുടെ കൂടി ഫലം വന്നതിന് ശേഷമാകും കുടുംബം ആശുപത്രി വിടുക.