ദോഹ: ബസ് യാത്രയ്ക്കുള്ള പേമെന്റ് സുഗമമാക്കുന്ന ആപ്പ് മുവാസലാത്ത് ഒരുക്കുന്നു. സ്മാര്‍ട്ട്‌ഫോണില്‍ ഈ ആപ്പ് ഇന്‍സ്റ്റാള്‍ ചെയ്തു കഴിഞ്ഞാല്‍ മുവസാലാത്തിന്റെ സ്മാര്‍ട്ട് കാര്‍ഡിന് പകരമായി ഉപയോഗിക്കാനാവും. മൊബൈല്‍ ഫോണ്‍ ഉപയോഗിച്ച് ടിക്കറ്റ് ചാര്‍ജ് അടക്കാന്‍ ആപ്പ് വഴി സാധിക്കും.
നിര്‍മാണം പൂര്‍ത്തിയായിക്കൊണ്ടിരിക്കുന്ന ആപ്പിന് ഇനിയും പേരിട്ടിട്ടില്ലെന്ന് മുവാസലാത്ത് അധികൃതര്‍ ഖത്തര്‍ ട്രിബ്യൂണിനോട് പറഞ്ഞു. പദ്ധതിയുടെ വിശദാംശങ്ങള്‍ ഉന്നത അധികൃതര്‍ക്ക് സമര്‍പ്പിച്ച് അംഗീകാരത്തിനായി കാത്തിരിക്കുകയാണ്.

ഓണ്‍ലൈന്‍ ബാങ്കിങ് വഴി ടോപ്പ് അപ്പ്, ബാലന്‍സ് അറിയാനുള്ള സൗകര്യം, ഓരോ യാത്രയുടെയും ടിക്കറ്റ് നിരക്ക് വിശദാംശങ്ങള്‍ തുടങ്ങിയ സൗകര്യങ്ങള്‍ ആപ്പില്‍ ലഭ്യമാണ്. സ്മാര്‍ട്ട് കാര്‍ഡ് റീചാര്‍ജ് ചെയ്യുന്നതിന് അടുത്ത കാലത്ത് അല്‍ഗാനിമിലെ ബസ് സ്‌റ്റേഷനില്‍ സെല്‍ഫ് സര്‍വീസ് മെഷീനുകള്‍ സ്ഥാപിച്ചിരുന്നു. എന്നാല്‍, ഖത്തറിന്റെ ഉള്‍പ്രദേശങ്ങളില്‍ താമസിക്കുന്നവരെ സംബന്ധിച്ചിടത്തോളം ഇവിടെ വന്ന് കാര്‍ഡ് റീചാര്‍ജ് ചെയ്യുക എന്നത് അപ്രാപ്യമായിരുന്നു.

പുതിയ സംവിധാനം ബസ് യാത്ര കൂടുതല്‍ ആകര്‍ഷകമാക്കുമെന്ന് സ്ഥിരമായി ബസ്സില്‍ യാത്ര ചെയ്യുന്ന അല്‍ഖോറിലെ തൊഴിലാളി പറഞ്ഞു. മുവാസലാത്ത് തങ്ങളുടെ ബസ്സുകളില്‍ സ്‌കൂള്‍ വിദ്യാര്‍ഥികള്‍ക്കു വേണ്ടിയുള്ള സുരക്ഷാ സംവിധാനം മെച്ചപ്പെടുത്താനും തീരുമാനിച്ചിട്ടുണ്ട്. വിദ്യാര്‍ഥികള്‍ ബസ്സില്‍ കയറിയ ഉടനെയും ബസ്സില്‍ നിന്ന് ഇറങ്ങിയ ഉടനെയും രക്ഷിതാക്കള്‍ക്ക് എസ്.എം.എസ് സന്ദേശം ലഭിക്കുന്ന സൗകര്യമാണ് ഏര്‍പ്പെടുത്തിയിട്ടുള്ളത്.