കാട്ടാക്കട: ലോക്ക്ഡൗണ്‍ നിയന്ത്രണങ്ങള്‍ മറികടന്ന് ചെന്നൈയില്‍ നിന്നും എത്തിയ ആളെ പിടികൂടി നിരീക്ഷണത്തിലാക്കി. ഇയാളെ അതിര്‍ത്തി കടന്നുവരാന്‍ സഹായിച്ചയാളും നിരീക്ഷണത്തിലായി. 

ചെന്നൈയിലെ തുറമുഖ ജോലിക്കാരനായ കാട്ടാക്കട കുറ്റിച്ചല്‍ കുളക്കോട് സ്വദേശിയേയും സുഹൃത്തിനെയുമാണ് കാട്ടാക്കട പൊലിസ് കസ്റ്റഡിയില്‍ എടുത്തത്. ഇന്നലെ രാവിലെ പതിനൊന്നു മണിയോടെ തമിഴ്‌നാട് രജിസ്‌ട്രേഷന്‍ കാറില്‍ എത്തിയപ്പോഴാണ് ഇവരെ പിടികൂടിയത്. കാര്‍ പരിശോധിച്ചപ്പോള്‍ തൊട്ടടുത്ത് വരെ പോകുകയാണെന്ന് പറഞ്ഞെങ്കിലും വിശദമായി ചോദിച്ചപ്പോഴാണ് ചെന്നൈയില്‍ നിന്നും വരികയാണെന്നു വ്യക്തമായത്. മീന്‍, പച്ചക്കറി ലോറികളില്‍ കേരളാ അതിര്‍ത്തി വരെ എത്തുകയായിരുന്നു. തുടര്‍ന്ന് സുഹൃത്തിന്റെ കാറില്‍ സ്വദേശമായ കുറ്റിച്ചലിലേക്ക് പോകുമ്പോഴാണ് കാട്ടാക്കട എസ്.ഐ സുരേന്ദ്രന്‍, എ.എസ്.ഐ സുരേഷ്, സി.പി.ഒ വിജു എന്നിവരുടെ വാഹനപരിശോധനയില്‍ കുടുങ്ങിയത്. പൊലിസ് കുറ്റിച്ചലിലെ ആരോഗ്യ വകുപ്പ് അധികൃതരെ വിവരം അറിയിച്ചതിനെ തുടര്‍ന്ന് ആംബുലന്‍സ് എത്തിച്ച് ഇരുവരെയും നെയ്യാറ്റിന്‍കര ആശുപത്രിയില്‍ സ്രവ പരിശോധന നടത്തിയ ശേഷം ലൂര്‍ദ് മാതായില്‍ സജ്ജീകരിച്ച ഐസൊലേഷന്‍ വാര്‍ഡിലേക്ക് മാറ്റുകയായിരുന്നു. പരിശോധന ഫലം വരുന്നതുവരെ ഇവര്‍ ഇവിടെ നിരീക്ഷണത്തില്‍ ആയിരിക്കും..