തിരുവനന്തപുരം: സംസ്ഥാനത്ത് കൊവിഡ് പ്രതിരോധ പ്രവര്‍ത്തനങ്ങല്‍ക്ക് നൂതന സംവിധാനമൊരുക്കാന്‍ തയ്യാറെടുത്ത് കേരളം. സംസ്ഥാനത്തേക്ക് വരുന്നവര്‍ക്ക് ഡിജിറ്റല്‍ പാസ് നിര്‍ബന്ധമാക്കാനാണ് നീക്കം. ഐടി മിഷന്റെ നേതൃത്വത്തിലാണ് ഡിജിറ്റല്‍ പ്രതിരോധ മാര്‍ഗ്ഗങ്ങള്‍ക്ക് രൂപം നല്‍കുന്നത്. 

അതേ സമയംചികിത്സാവിവരങ്ങള്‍ തത്സമയം അപേഡറ്റ് ചെയ്യുന്ന, രോഗസാധ്യതയുളളവരുടെ വിവരങ്ങള്‍ അറിയിക്കാന്‍ സാധിക്കുന്ന മൊബൈല്‍ ആപ്പ് കൊണ്ടുവരുന്നതും പരിഗണനയിലാണ്.

വിദേശത്ത് നിന്നോ മറ്റ് സംസ്ഥാനങ്ങളില്‍ നിന്നോ വരുന്നവര്‍ മുന്‍കൂട്ടി വിവരം രജിസ്റ്റര്‍ ചെയ്യണം. മുന്‍കൂര്‍ അനുമതി കിട്ടുന്നവര്‍ക്ക് ഡിജിറ്റല്‍ പാസ് അനുവദിക്കാനാണ് സര്‍ക്കാര്‍ നീക്കം. പാസുളളവര്‍ക്കേ വിമാനത്താവളത്തില്‍ നിന്നോ റെയില്‍വെ സ്റ്റേഷനില്‍ നിന്നോ പുറത്തുകടക്കാനാവൂ.

ഗതാഗതമാര്‍ഗ്ഗങ്ങള്‍ തുറന്നു കൊടുക്കുമ്പോള്‍ തിരിച്ചെത്തുന്നവരിലൂടെ രോഗം വീണ്ടും വ്യാപിക്കാനുളള സാധ്യത കണക്കിലെടുത്താണ് ഇത്തരത്തിലുള്ള പദ്ധതി നടപ്പിലാക്കാന്‍ സംസ്ഥാനം ഒരുങ്ങുന്നത്.