മയാമി: ലോക ടെന്നീസ് രാജാക്കളായ റോജര്‍ ഫെഡററും റാഫേല്‍ നദാലും ഏറ്റുമുട്ടിയപ്പോള്‍ ജയം വീണ്ടും ഫെഡററിനു തന്നെ. മയാമി ഓപണ്‍ ടെന്നീസ് പുരുഷ സിംഗിള്‍സ് ഫൈനലിലാണ് ഇന്ന് മുന്‍ ലോക ഒന്നാം നമ്പര്‍ താരങ്ങള്‍ ഏറ്റുമുട്ടിയത്. ഈ വര്‍ഷം മൂന്നാം തവണയാണ് ഫെഡറര്‍ നദാലിനെ കീഴ്‌പ്പെടുത്തന്നത്. നേരിട്ടുള്ള സെറ്റുകള്‍ക്കാണ് ഫെഡറര്‍ നദാലിനെ തോല്‍പ്പിച്ചത്. സ്‌കോര്‍: 6-3, 6-4.

സെമിയില്‍ റോജര്‍ ഫെഡറര്‍ ആസ്‌ത്രേലിയന്‍ നിക്ക് കിര്‍ഗിയോസിനെ പരാജയപ്പെടുത്തിയാണ് ഫൈനലിനെത്തിയത്.
ഇറ്റാലിയന്‍ താരം ഫാബിയോ ഫോഗ്‌നിനിയെ പരാജയപ്പെടുത്തിയാണ് നദാല്‍ കലാശപോരാട്ടത്തിലേക്കെത്തിയത്.

ഈ സീസണില്‍ മൂന്നാം തവണയാണു വിവിധ ടൂര്‍ണമെന്റുകളിലായി ഫെഡറര്‍- നദാല്‍ നേര്‍ക്കുനേര്‍ വന്നത്. നേരത്തെ ആസ്‌ത്രേലിയന്‍ ഓപണിന്റെ ഫൈനലിലും പിന്നീട് ഇന്ത്യന്‍ വെല്‍സിന്റെ നാലാം റൗണ്ടിലും നേര്‍ക്കുനേര്‍ വന്നിരുന്നു.
ആസ്‌ത്രേലിയന്‍ ഓപണ്‍ കിരീടവും പിന്നാലെ ഇന്ത്യന്‍സ് വെല്‍സ് കിരീടവും നേടിയ ഫെഡറര്‍ സീസണില്‍ മികച്ച ഫോമിലാണ്.
മയാമി ഓപണ്‍ കിരീടവും സ്വന്തമാക്കിയതോടെ സീസണിലെ മൂന്നാം കിരീടമാണു സ്വിസ് ഇതിഹാസം തന്റെ അക്കൗണ്ടിലാക്കിയത്. വീണ്ടും ഫെഡറര്‍ക്കു മുന്നില്‍ അടിയറവു പറയുന്ന നദാലിനെയാണ് ഇന്നും കാണാനായത്.