സ്വന്തം ലേഖകന്‍

കോഴിക്കോട്: മാനാഞ്ചിറ സ്‌ക്വയര്‍ നവീകരണത്തിനായി തയാറാക്കിയ പദ്ധതികള്‍ കടലാസിലൊതുങ്ങുന്നു. നവീകരണത്തിനായി ജില്ലാ ടൂറിസം പ്രമോഷന്‍ കൗണ്‍സിലിന്റെ ആഭിമുഖ്യത്തിലാണ് പദ്ധതി നടപ്പിലാക്കിയിരുന്നതെങ്കിലും ഇതുവരെയും പൂര്‍ത്തീകരിക്കാന്‍ അധികൃതര്‍ക്ക് സാധിച്ചിട്ടില്ല. കോര്‍പറേഷനും ഡി.ടി.പി.സിയും 2.85 കോടി രൂപയുടെ പദ്ധതിയാണ് ആവിഷ്‌കരിച്ചത്. ഡി.ടി.പി.സി 1.7 കോടി രൂപയും കോര്‍പറേഷന്‍ 80 ലക്ഷം രൂപയും വകയിരുത്തിയിട്ടുണ്ട്.
കോഴിക്കോട്ടെ സാംസ്‌കാരിക പ്രവര്‍ത്തനങ്ങളുടെ കേന്ദ്രമായ ഇവിടെ 18 ലക്ഷം രൂപ ചെലവില്‍ ഓപ്പണ്‍ എയര്‍ സ്റ്റേജും ചുറ്റുമുള്ള കല്ല് പാകിയ ഭാഗവും നവീകരിക്കല്‍, കൂടുതല്‍ ഭാഗങ്ങളില്‍ 12 ലക്ഷം രൂപ ചെലവില്‍ ഗ്രാനൈറ്റ് പാകല്‍, വിളക്കുകളുടെ സംരക്ഷണത്തിനും സൗന്ദര്യവല്‍കരണത്തിനും 36 ലക്ഷം രൂപ ചെലവഴിച്ച് ഡൂമുകളും സുതാര്യമായ പോളി കാര്‍ബണേറ്റ് ഷീറ്റും സ്ഥാപിക്കല്‍, തകര്‍ന്ന മതിലുകള്‍ ശരിയാക്കാന്‍ 20 ലക്ഷം രൂപ എന്നിവയായിരുന്നു പദ്ധതിയില്‍ ഉള്‍ക്കൊള്ളിച്ചിരുന്നത്. ടോയ്‌ലെറ്റുകള്‍ നിര്‍മിക്കാന്‍ 40 ലക്ഷം രൂപ, സൂചന ബോര്‍ഡുകള്‍ സ്ഥാപിക്കാന്‍ അഞ്ചുലക്ഷം രൂപ എന്നിവയും പദ്ധതിയില്‍ വകയിരുത്തിയവയാണ്.
ശില്‍പങ്ങളുടെയും മരങ്ങളുടെയും ചരിത്രപ്രാധാന്യമുള്ള ഇടങ്ങളുടെയും സമീപത്ത് ഇലക്ട്രിക് ലൈറ്റുകള്‍ സ്ഥാപിക്കാനും മാനാഞ്ചിറയിലേക്കുള്ള കവാടവും ഗേറ്റും നവീകരിക്കുന്നതിനായും തുക വകയിരുത്തിയിരുന്നു. കൂടാതെ ഇവിടെ പുല്ല് വച്ചുപിടിപ്പിക്കാനും ലാന്‍ഡ്‌സ്‌കേപ്പ് ചെയ്യാനും പദ്ധതിയുണ്ടായിരുന്നു. ഇത് കാലങ്ങളായി പറയുകയല്ലാതെ പദ്ധതി നടപ്പാക്കാന്‍ അധികൃതര്‍ ഇതുവരെയും തയാറായിട്ടില്ല. പദ്ധതിക്ക് സാങ്കേതികാനുമതി ഇതുവരെ ലഭിച്ചിട്ടില്ലെന്നും അതിനുള്ള നടപടികള്‍ അവസാനഘട്ടത്തിലാണെന്നുമാണ് ഡി.ടി.പി.സി അധികൃതര്‍ ഇപ്പോഴും പറയുന്നത്.
മാനാഞ്ചിറ മൈതാനത്ത് ആളുകള്‍ക്ക് വിശ്രമിക്കാനായി നിര്‍മിച്ച വിശ്രമകേന്ദ്രത്തില്‍ ഒരെണ്ണം തകര്‍ന്നുവീണിട്ട് രണ്ടുമാസമായി. മാസങ്ങള്‍ക്ക് മുന്‍പ് തണല്‍മരം കടപുഴകി വീണാണ് ഇത് തകര്‍ന്നത്. വിശ്രമ മണ്ഡപത്തിന്റെ മേല്‍ക്കൂരയും ചെങ്കല്‍തൂണും പൂര്‍ണമായും തകര്‍ന്നു. മണ്ഡപത്തിലെ നിലത്ത് പാകിയ ഗ്രാനൈറ്റിനും സാരമായ കേടുപാടുകള്‍ സംഭവിച്ചു.
എന്നാല്‍ ഇതുവരെയും അധികൃതര്‍ അവശിഷ്ടങ്ങള്‍ നീക്കം ചെയ്യുകയോ മാറ്റി സ്ഥാപിക്കുകയോ ചെയ്തിട്ടില്ല. സ്‌പോര്‍ട്‌സ് കൗണ്‍സില്‍ ഹാളിന്റെ സമീപത്ത് കുടില്‍ മാതൃകയില്‍ കെട്ടിയതാണ് നിലം പതിച്ചത്. മേല്‍ക്കൂരയും ചെങ്കല്ലുകളും താഴെ പാകിയ ഗ്രാനേറ്റുമെല്ലാം ചിതറിക്കിടക്കുയാണെങ്കിലും ഇതുവരെ ഇത് മാറ്റിയിട്ടു പോലുമില്ല. കൂടാതെ അന്‍സാരി പാര്‍ക്കില്‍ സ്ഥാപിച്ച മലയാള സാഹിത്യത്തിലെ അതുല്യകഥാപാത്രങ്ങളുടെ പ്രതിമകളും തകര്‍ന്നിട്ട് കാലങ്ങളായി. ഇതും എടുത്തുമാറ്റാനോ മൂടിവയ്ക്കാനോ അധികൃതര്‍ ഇതുവരെ ശ്രമിച്ചിട്ടില്ല. ഇക്കാര്യങ്ങള്‍ ശ്രദ്ധയില്‍പെടുത്തുമ്പോള്‍ പദ്ധതിയുടെ ഭാഗമായി നവീകരിക്കുമെന്ന മറുപടിയാണ് ലഭിക്കുന്നതെന്ന ആരോപണവും ഉയര്‍ന്നിട്ടുണ്ട്.