റിയാദ്: കോണ്‍ഗ്രസിന് അര്‍ഹതപ്പെട്ട രാജ്യസഭാ സീറ്റ് കേരള കോണ്‍ഗ്രസ് മാണി വിഭാഗത്തിന് നല്‍കിയതിനെതിരേ കോണ്‍ഗ്രസ് പ്രവാസി സംഘടനയില്‍ വ്യാപക പ്രതിഷേധം. കോണ്‍ഗ്രസ് പ്രവാസി സംഘടനയായ ഒ.ഐ.സി.സിയുടെ സഊദി റിയാദ് സെന്‍ട്രല്‍ കമ്മിറ്റിയും വിവിധ പ്രദേശങ്ങളിലെ പല നേതാക്കളും ഇതിനെതിരേ ശക്തമായ പ്രതിഷേധവുമായി രംഗത്ത് വന്നിട്ടുണ്ട്. പലരും സോഷ്യല്‍ മീഡിയകള്‍ വഴിയും മറ്റും തങ്ങളുടെ രോഷം പരസ്യമായി പങ്കുവയ്ക്കുകയും ചെയ്യുന്നുണ്ട്.
മാണിക്ക് രാജ്യസഭാ സീറ്റ് നല്‍കിയതോടെ പ്രതിസന്ധിയിലായ കോണ്‍ഗ്രസ് വലിയ വില നല്‍കേണ്ടി വരുമെന്ന് ഒ.ഐ.സി.സി സെന്‍ട്രല്‍ കമ്മിറ്റി മുന്നറിയിപ്പ് നല്‍കിയിട്ടുണ്ട്. കേരളത്തിലെ കോണ്‍ഗ്രസ് നേതൃത്വം ആത്മഹത്യാ പരമായ തീരുമാനമാണ് കൈക്കൊണ്ടതെന്നും സെന്‍ട്രല്‍ കമ്മിറ്റി അഭിപ്രായപ്പെട്ടു.