കൊവിഡ് കാലത്ത് മുഖ്യമന്ത്രി പിണറായി വിജയന്റെ പി.ആര്‍ വര്‍ക്കിനെപ്പറ്റി വ്യാപകമായ ആരോപണങ്ങള്‍ ഉയരുന്നതിനിടെ ഇന്നത്തെ ദേശാഭിമാനി പത്രത്തില്‍ ഒരു ചിത്ര പ്രസിദ്ധീകരിച്ചു. താങ്ക്‌സ് പിണറായി എന്നെഴുതിയ ബില്‍ ബോര്‍ഡാണ് ചിത്രം. ഓസ്‌ട്രേലിയയിലെ മെല്‍ബണ്‍ നഗരത്തില്‍ അവിടത്തെ പ്രധാന മൊബൈല്‍ഫോണ്‍ സേവനദാതാക്കളായ ടെല്‍സ്ട്രയുടെ കെട്ടിടത്തിലാണ് പിണറായിയുടെ പേര് പ്രസിദ്ധീകരിച്ചത്. മുഖ്യമന്ത്രിക്ക് ആദരമര്‍പ്പിച്ചാണ് ബോര്‍ഡ് സ്ഥാപിച്ചതെന്നും ദേശാഭിമാനി പത്രത്തില്‍ പറയുന്നു.

ദേശാഭിമാനിയുടെ ഈ ചിത്രംവച്ച് പലരും സാമൂഹ്യമാധ്യമങ്ങളില്‍ പ്രചരിപ്പിക്കുന്നത്, ലോകനേതാക്കളുടെ പേര് മാത്രം കാണിക്കുന്ന വിശ്വവിഖ്യാതമായ ബില്‍ബോര്‍ഡില്‍ പിണറായിക്ക് നന്ദി അറിയിച്ചു എന്നാണ്.

എന്നാല്‍ ഇതൊരു ഓണ്‍ലൈന്‍ ക്യാംപയിന്റെ ഭാഗമാണെന്നും ആര്‍ക്കും ഒരു എസ്.എം.എസ് ചെലവില്‍ ചെയ്യാവുന്നതേയുള്ളൂ ഇതെന്നും കമ്പനിയുടെ വെബ്‌സൈറ്റില്‍ വ്യക്തമാക്കുന്നു. കൊറോണയെ നേരിടുന്നതില്‍ നിങ്ങളെ സഹായിക്കുന്ന ആര്‍ക്കും ബോര്‍ഡിലൂടെ നന്ദി അറിയിക്കാം. അയല്‍വാസികള്‍, ആരോഗ്യപ്രവര്‍ത്തകര്‍ തുടങ്ങി ടോയ്‌ലറ്റ് പേപ്പര്‍ കൊണ്ടുവരുന്നവര്‍ക്ക് വരെ നന്ദി അറിയിക്കാമെന്നും കമ്പനിയുടെ വെബ്‌സൈറ്റില്‍ വ്യക്തമാക്കുന്നു. നന്ദി അറിയിക്കേണ്ടവരുടെ പേരും വിവരങ്ങളും നല്‍കിയാല്‍ തിരിച്ച് നിങ്ങള്‍ക്ക് അവരുടെ പേര് ബില്‍ ബോര്‍ഡില്‍ പ്രസിദ്ധീകരിച്ച് ഫോട്ടോ അയച്ചുതരും. ഫോട്ടോ അയച്ചുതരാനുള്ള എസ്.എം.എസ് നിരക്ക് ഈടാക്കുമെന്നും കമ്പനി വ്യക്തമാക്കുന്നു.