പാലക്കാട്: ബിജെപി നേതൃത്വത്തോട് ഇടഞ്ഞ് പരസ്യ നിലപാടെടുത്ത സന്ദീപ് ജി വാര്യരെ അനുനയിപ്പിക്കാന്‍ ആര്‍എസ്എസ് ഇടപെടല്‍. ആര്‍.എസ്.എസ് വിശേഷ് സമ്പര്‍ക് പ്രമുഖ് എ ജയകുമാര്‍, ബി.ജെ.പി നേതാവ് പി.ആര്‍ ശിവശങ്കര്‍ എന്നിവര്‍ സന്ദീപ് വാര്യരുടെ വീട്ടിലെത്തി കൂടിക്കാഴ്ച്ച നടത്തി. അടച്ചിട്ട മുറിയിലായിരുന്നു ചര്‍ച്ച. 

ദത്താത്രേയ ഹൊസബാലെയുമായി എഡിജിപി എംആര്‍ അജിത്കുമാറിന് കൂടിക്കാഴ്ച്ചയൊരുക്കിയ ആളാണ് ജയകുമാര്‍. ജേഷ്ഠ്യ തുല്യനായ ജയകുമാര്‍ വന്നതില്‍ താന്‍ സന്തോഷവാനാണെന്നും താന്‍ ഇപ്പോഴും ബി.ജെ.പിക്കാരനാണെന്നും സന്ദീപ് വ്യക്തമാക്കി. 

പാര്‍ട്ടിയില്‍ നിന്ന് നിരന്തരം അവഗണന നേരിട്ടതാണ് സന്ദീപ് ഇടയാന്‍ കാരണം.  അപമാനിതനായെന്നും പ്രശ്‌നപരിഹാരത്തിന് നേതൃത്വം ശ്രമിച്ചില്ലെന്നും സന്ദീപ് വാര്യര്‍ കുറ്റപ്പെടുത്തി. അമ്മ മരിച്ചിട്ടുപോലും തന്റെ വീട്ടില്‍ വരാത്ത പാലക്കാട്ടെ സ്ഥാനാര്‍ഥി സി കൃഷ്ണകുമാറിനായി പ്രചാരണത്തിനിറങ്ങില്ലെന്നും സന്ദീപ് വാര്യര്‍ പറഞ്ഞിരുന്നു. പാര്‍ട്ടി പരിപാടികളിലും വേദികളിലും നിരന്തരം നേരിട്ട അവഗണനയാണ് വിട്ടുനില്‍ക്കലിന് പ്രേരിപ്പിച്ചതെന്നും സന്ദീപ് പറഞ്ഞിരുന്നു. 
തുടര്‍ന്നാണ് വിഷയത്തില്‍ ഇടപെട്ട് ആര്‍.എസ്.എസ് രംഗത്തെത്തിയത്. 

ഉപതിരഞ്ഞെടുപ്പ് അടുത്തിരിക്കെ ജില്ലാ നേതാക്കളില്‍ പ്രധാനിയായ സന്ദീപിന്റെ പരസ്യ പ്രതികരണം ബി.ജെ.പിക്കും തലവേദനയാണ്. 

RSS to convince Sandeep Warrier attend a meeting in residence