ബെയ്ജിങ്: ബാക്കിയുള്ള ലോകത്തിനുമേല്‍ തങ്ങളുടെ നയങ്ങള്‍ അടിച്ചേല്‍പ്പിക്കുകയാണ് അമേരിക്ക ചെയ്യുന്നതെന്ന് ഇറാന്‍ പ്രസിഡന്റ് ഹസന്‍ റൂഹാനി. ചൈനീസ് തീരനഗരമായ ക്വിങ്ഡാഗോയില്‍ നടന്ന ഷാങ്ഹായ് കോഓപറേഷന്‍ ഓര്‍ഗനൈസേഷന്‍(എസ്.സി.ഒ) ഉച്ചകോടിയില്‍ സംസാരിക്കുകയായിരുന്നു അദ്ദേഹം. ഉച്ചകോടിക്കിടെ റഷ്യന്‍ പ്രസിഡന്റ് വ്‌ളാദ്മിര്‍ പുടിന്‍ അടക്കമുള്ള വിവിധ ലോകനേതാക്കളുമായി അദ്ദേഹം കൂടിക്കാഴ്ച നടത്തി.
യു.എസ് തുടരുന്ന ഏകപക്ഷീയനയങ്ങളുടെയും അന്താരാഷ്ട്ര സമൂഹത്തിന്റെ തീരുമാനങ്ങളോടുള്ള ധിക്കാരത്തിന്റെയും തെളിവാണ് ഇറാന്‍ ആണവ കരാറില്‍നിന്നുള്ള അവരുടെ പിന്മാറ്റമെന്ന് റൂഹാനി കുറ്റപ്പെടുത്തി. കരാര്‍ നിലനിര്‍ത്താന്‍ ചൈനയും റഷ്യയും നടത്തുന്ന നിരന്തര പരിശ്രമങ്ങളെ അദ്ദേഹം അഭിനന്ദിക്കുകയും ചെയ്തു.