കരുവാരകുണ്ട്: ഇന്നലെ വൈകിട്ട് കരുവാരകുണ്ടിലും തുവ്വൂരിലുമുണ്ടായ കനത്ത കാറ്റില്‍ മരങ്ങള്‍ കടപുഴകിവീണ് വന്‍ നാശനഷ്ടം. തുവ്വൂര്‍ പാണ്ടിപ്പുല്ല് ഭാഗത്ത് മരം റോഡില്‍ വീണ് ഗതാഗതം തടസപ്പെട്ടു. ആലത്തൂരിലെ അക്കരമ്മല്‍ മുഹമ്മദിന്റെ വീടിനു മുകളില്‍ റബര്‍ മരങ്ങള്‍ വീണു. വീട്ടുവളപ്പിലുള്ള അനവധി മരങ്ങളാണ് വീണത്. തൊട്ടടുത്ത പ്രദേശങ്ങളിലും ധാരാളം മരങ്ങള്‍ വീണിട്ടുണ്ട്.
കുട്ടത്തിയിലുണ്ടായ ശക്തമായ കാറ്റില്‍ മരങ്ങള്‍ നിലംപൊത്തി. കുട്ടത്തി, മുക്കട്ട, പള്ളിപ്പടി റോഡില്‍ മരങ്ങള്‍ കടപുഴകിവീണ് ഗതാഗത തടസം നേരിടുകയും വൈദ്യുതി ബന്ധം താറുമാറാകുകയും ചെയ്തു. വൈദ്യുതിക്കാലുകളും തകര്‍ന്നിട്ടുണ്ട്. നിരവധി റബര്‍ മരങ്ങളും നശിച്ചിട്ടുണ്ട്. നാട്ടുകാരുടെ സാഹസികമായ ഇടപെടലിനെ തുടര്‍ന്നാണ് റോട്ടിലെ തടസങ്ങള്‍ നീക്കം ചെയ്തു ഗതാഗതം പുനഃസ്ഥാപിച്ചത്.