മലപ്പുറം: കൊവിഡ്-19 ലോക്ക് ഡൗണ്‍ പശ്ചാത്തലത്തില്‍ സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡും  ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സിലും മദ്‌റസാ അധ്യാപകര്‍ക്ക് അനുവദിച്ച ധനസഹായം വിതരണോദ്ഘാടനം സമസ്ത കേരളാ ജംഇയ്യത്തുല്‍ ഉലമാ ഉപാധ്യക്ഷന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിച്ചു. 

പാണക്കാട് ദാറുന്ന ഈമില്‍ നടന്ന ചടങ്ങില്‍ പാണക്കാട് മഅ്ദനുല്‍ ഉലൂം മദ്‌റസാ സദര്‍ മുഅല്ലി സ്വാലിഹ് അഹ്‌സനിക്കു തുക കൈമാറി. സയ്യിദ് സ്വാദിഖലി ശിഹാബ് തങ്ങള്‍, സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍, എസ്.കെ.ജെ.എം.സി.സി സെക്രട്ടി കെ.ടി.ഹുസൈന്‍ കുട്ടി മുസ്‌ലിയാര്‍ പങ്കെടുത്തു.

 സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡ് അംഗീകാരത്തോടെ കേരളത്തിലും ഇതര നാടുകളിലും പ്രവര്‍ത്തിക്കുന്ന പതിനായിരത്തിലേറെ മദ്‌റസയിലെ അധ്യാപകര്‍ക്കാണ് സമസ്തയുടെ  ധനസഹായം പ്രഖ്യാപിച്ചത്. വിദ്യാഭ്യാസ ബോര്‍ഡ് ആയിരം രൂപയും, ജംഇയ്യത്തുല്‍ മുഅല്ലിമീന്‍ ആയിരം രൂപയുമാണ് ധനസഹായം അനുവദിച്ചത്.