കൊല്ലം: കൊല്ലം ജില്ലാ അതിര്‍ത്തിയ കുളത്തൂപ്പുഴയില്‍ ഒരാള്‍ക്ക് കൊവിഡ് സ്ഥിരീകരിച്ചതോടെ കര്‍ശന നിയന്ത്രണം. ആര്യങ്കാവ്, തെന്മല പഞ്ചായത്തുകളില്‍ സമ്പൂര്‍ണ ലോക്ക്ഡൗണും പ്രഖ്യാപിച്ചു. തമിഴ്‌നാട് അതിര്‍ത്തിയായ പുളിയന്‍ കുടിയില്‍ കൊവിഡ് 19 പടര്‍ന്ന് പിടിക്കുന്ന സാഹചര്യവുമുണ്ട്. ഇതോടെയാണ് നിയന്ത്രണങ്ങള്‍ ഏര്‍പ്പെടുത്തിയിരിക്കുന്നത്. അതിര്‍ത്തി വഴിയുള്ള പാതയും അടച്ചിരിക്കുകയാണ്.

സര്‍ക്കാര്‍ വാഹനങ്ങള്‍ മാത്രമാണ് അതിര്‍ത്തി കടത്തി വിടുന്നത്. കാട്ടുവഴിയിലും പരിശോധനകള്‍ ശക്തമാക്കിയിരിക്കുകയാണ്. ഇതു വഴിയും ആരെയും കടത്തിവിടുന്നില്ല.
അതേ സമയം കുളത്തൂപ്പുഴ പഞ്ചായത്ത് പൂര്‍ണമായും അടച്ചെന്ന് മന്ത്രി കെ.രാജു അറിയിച്ചു.
തെന്മല, ആര്യങ്കാവ്, കുളത്തൂപ്പുഴ പഞ്ചായത്തുകളില്‍ 24ന് ശേഷവും ലോക്ഡൗണ്‍ തുടരും
ഈ പ്രദേശങ്ങളില്‍ ലോക്ഡൗണ്‍ ഇളവുകള്‍ ഉണ്ടാകില്ല. പ്രതിരോധ നടപടികള്‍ ചര്‍ച്ച ചെയ്യാനായി മന്ത്രി കെ.രാജുവിന്റെ നേതൃത്വത്തില്‍ അടിയന്തര യോഗം ചേര്‍ന്നിരുന്നു.