കൊച്ചി: സ്പ്രിംഗ്ലര്‍ കരാര്‍ റദ്ദാക്കണമെന്നാവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല ഹൈക്കോടതിയില്‍ ഹരജി സമര്‍പ്പിച്ചു. 

യാതൊരുവിധ അധികാരവുമില്ലാതെയാണ് ഐ.ടി സെക്രട്ടറി യു.എസ് കമ്പനിയായ സ്പ്രിംഗ്ലറുമായി കരാറിലേര്‍പ്പെട്ടത്. സംസ്ഥാന സര്‍ക്കാര്‍, തദ്ദേശ സ്വയംഭരണവകുപ്പ് സെക്രട്ടറി, കേന്ദ്ര സര്‍ക്കാര്‍, സ്പ്രിംഗ്ലര്‍ കമ്പനി, ഐ.ടി സെക്രട്ടറി എം ശിവശങ്കര്‍, മുഖ്യമന്ത്രി പിണറായി വിജയന്‍ എന്നിവരെ എതൃകക്ഷികളാക്കിയാണ് ഹരജി സമര്‍പ്പിച്ചത്. 

സ്പ്രിംഗ്ലര്‍ കമ്പനിയുടെ വെബ്‌സൈറ്റില്‍ ഡേറ്റാ അപ്‌ലോഡ് ചെയ്യുന്നതു തടയണമെന്ന് ഹരജിയില്‍ ആവശ്യപ്പെട്ടു. കരാറുമായി ബന്ധപ്പെട്ട എല്ലാ രേഖകളും വിളിച്ചു വരുത്തി പരിശോധിക്കണമെന്നും ഹരജിയില്‍ പറയുന്നു. 

നിയമ സാധുതയും അനുമതിയുമില്ലാതെ ഡേറ്റ ശേഖരിക്കപ്പെട്ട വ്യക്തികള്‍ക്ക് നഷ്ടപരിഹാരം നല്‍കണം. നഷ്ടപരിഹാരം ഐ.ടി.സെക്രട്ടറി, മുഖ്യമന്ത്രി എന്നിവരില്‍നിന്നു ഈടാക്കണം.

രോഗികളുടെയും നിരീക്ഷണത്തിലിരിക്കുന്നവരുടെയും ഡേറ്റാ അപ്‌ലോഡ് ചെയ്യുന്ന നടപടി ഹരജി തീര്‍പ്പാക്കുന്നതുവരെ തടയണമെന്നും ചെന്നിത്തല ആവശ്യപ്പെട്ടിട്ടുണ്ട്. ഹരജി 24നു കോടതി പരിഗണിക്കും. അഭിഭാഷകരായ ടി ആസഫലി, സി റഷീദ്, വി.എസ് ചന്ദ്രശേഖരന്‍, വൈ ലാലിസ എന്നിവര്‍ മുഖേനയാണ് ചെന്നിത്തല ഹരജി സമര്‍പ്പിച്ചത്.