അമ്പലപ്പുഴ: മതിലിടിഞ്ഞ് വീണ് കെ.എസ്.ആര്‍.ടിസി ഡ്രൈവര്‍ മരിച്ചു. പുന്നപ്ര വടക്കു പഞ്ചായത്ത് പന്ത്രണ്ടാം വാര്‍ഡില്‍ തേവലപ്പുറത്ത് വെളിവീട്ടില്‍ ചന്ദ്രശേഖരന്‍ നായരുടെ മകനും കെ.എസ്.ആര്‍.ടി.സി ആലപ്പുഴ ഡിപ്പോയിലെ ഡ്രൈവറുമായ പ്രദീപ് കുമാര്‍ (51) ആണ് മരിച്ചത്. ഒപ്പമുണ്ടായിരുന്ന സുഹൃത്തും പ്ലംബറുമായ പനയക്കുളങ്ങര കൈതക്കാട് വീട്ടില്‍ ബാലചന്ദ്ര (50)നെ ഗുരുതര പരുക്കുകളോടെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. 

 ഇന്നലെ ഉച്ചക്ക് 12.30 ഓടെ പഴയ നടക്കാവ് റോഡില്‍ പറവൂര്‍ ഗവ.ഹയര്‍ സെക്കന്‍ഡറി സ്‌കൂളിന് തെക്കുഭാഗത്തായിരുന്നു അപകടം. സുഹൃത്തായ ബാലചന്ദ്രന്റെ വീട്ടുപറമ്പില്‍ നിന്നുള്ള വെള്ളം റോഡരികിലെ കാനയിലേക്ക് ഒഴുക്കി വിടുന്നതിനായി പൈപ്പിടുന്നതിനിടെ മതില്‍ ഇടിഞ്ഞു  രണ്ടു പേരുടേയും ദേഹത്തേക്ക് വീഴുകയായിരുന്നു. 

ഉടന്‍ നാട്ടുകാര്‍ ഇരുവരേയും ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും പ്രദീപ് കുമാറിന്റെ ജീവന്‍ രക്ഷിക്കാനായില്ല. ഏറ്റവും മികച്ച കെ.എസ്.ആര്‍.ടി.സി ഡ്രൈവര്‍ക്കുള്ള അവാര്‍ഡ് പ്രദീപ് കുമാര്‍ നേടിയിട്ടുണ്ട്. 

ഭാര്യ: ജയന്തി. മക്കള്‍: പ്രവീണ്‍, പൂജ.