മലപ്പുറം: ലോക്ഡൗണ്‍ നിയന്ത്രണങ്ങളുടെ പശ്ചാത്തലത്തില്‍ വിശുദ്ധിയുടെ റമദാന്‍ കാലം ഇത്തവണ വീടുകളെ ഭക്തിനിര്‍ഭരമാക്കും .ലോക്ഡൗണ്‍ കാരണം പള്ളികളില്‍ സംഘടിക്കുന്നതിലുള്ള നിയന്ത്രണം വിശുദ്ധ റമദാനിലും തുടരുന്നതിനാലാണ് ഇത്തവണ റമദാന്‍ കാലം വീടുകളില്‍ സജീവമാകാനിരിക്കുന്നത്. ഭജനമിരിക്കലും, നോമ്പു തുറകളും,തറാവീഹ് നിസ്‌കാരവും ഇത്തവണ പള്ളികളില്‍ നടത്താനാവില്ല.പകരം വീടുകള്‍ പുണ്യ കര്‍മങ്ങള്‍ കൊണ്ട് അനുഗ്രഹീതമാവും. റമദാനെ വരവേല്‍ക്കാന്‍ ശുചീകരണ പ്രവൃത്തികള്‍ നടത്തിയും മറ്റും വീടുകളില്‍ ഒരു മാസം മുന്‍പു തന്നെ വിശ്വാസികള്‍ ഒരുക്കങ്ങള്‍ നടത്തിയിരുന്നു.
റമദാന്‍ മുന്നൊരുക്ക സന്ദേശ പരിപാടികള്‍ ഇത്തവണ ഓണ്‍ലൈനായാണ് നടന്നത്. റമദാന്‍ പ്രഭാഷണങ്ങളും പ്രാര്‍ഥനകളും ലോക് ഡൗണ്‍ കാരണം ഉത്തവണ പൊതു പരിപാടികളായി നടക്കില്ല. പകരം ഇത്തരം പരിപാടികള്‍ ഓണ്‍ലൈനായും ലൈവ് പ്രോഗ്രാമുകളായും നടക്കും. റമദാന്‍ നാളുകളില്‍ സജീവമാകാറുള്ള വിഭവങ്ങളുടെ വിപണികള്‍ക്കും ഇത്തവണ മാറ്റുകുറയും.ഗംഭീരമായി നടന്നിരുന്ന റമദാന്‍ ഇഫ്താര്‍ പരിപാടികളും ഇത്തവണ ഇത്തവണ ഉണ്ടാകില്ല. വിവിധ സംഘടനകളും, രാഷ്ട്രീയ പാര്‍ട്ടികളും സാംസ്‌കാരിക സംഘടനകളും നടത്തിയിരുന്ന ഇഫ്താര്‍ മീറ്റുകള്‍ ഇത്തവണ ലോക്ഡൗണ്‍ കാരണം മാറ്റിവെക്കാന്‍ തീരുമാനമായിട്ടുണ്ട്.
ലോക്ഡൗണാണെങ്കിലും പതിവുപോലെ റമദാനിനു മുന്നോടിയായി റിലീഫ് പ്രവര്‍ത്തനങ്ങള്‍ ഇത്തവണയും വിവിധ ഭാഗങ്ങളില്‍ നടന്നു. മഹല്ലു കമ്മിറ്റികളുടെയും മത, രാഷ്ട്രീയ സംഘടനകളുടെയും നേതൃത്വത്തിലാണ് നിയന്ത്രണങ്ങള്‍ മറികടക്കാതെ റിലീഫ് പ്രവര്‍ത്തനങ്ങള്‍ നടന്നത്. ലോക് ഡൗണ്‍ പശ്ചാതലത്തില്‍ റമദാന്‍ റിലീഫ് പ്രവര്‍ത്തനങ്ങള്‍ നിര്‍ധന കുടുംബങ്ങള്‍ക്ക് ഏറെ ആശ്വാസമായി.
നിയന്ത്രണങ്ങള്‍ ശക്തമായതിനാല്‍ വീടുകളിലെ പ്രാര്‍ഥനകള്‍ സജീവമാക്കാനുള്ള തയാറെടുപ്പിലാണ് വിശ്വാസികള്‍. വീടുകള്‍ പ്രാര്‍ഥനകള്‍ കൊണ്ട് ധന്യമാക്കാനുള്ള ഒരുക്കങ്ങള്‍ നടക്കുന്നതിനിടയിലും വിശുദ്ധ റമദാനില്‍ പള്ളികളിലെ ആരാധനകള്‍ മുടങ്ങിയതിന്റെ വേദനയാണ് വിശ്വാസി ഹൃദയങ്ങളില്‍.