ചാവക്കാട്: പുന്നയൂര്‍ പഞ്ചായത്തിലെ അകലാട് ആടുകള്‍ക്കിടയില്‍ വൈറസ് രോഗം പടരുന്നു. ഒന്നര മാസത്തിനുള്ളില്‍ ഒരു വീട്ടില്‍ ചത്തത് ഏഴെണ്ണം.അകലാട് ബദര്‍പള്ളി ബീച്ചില്‍ പടിഞ്ഞാപ്പുറത്ത് ബാദുഷയുടെ എഴ് ആടുകളാണ് അത്യപൂര്‍വമായ വൈറസ് രോഗം ബാധിച്ച് ചത്തത്. രോഗ ബാധയുള്ളത് മൂന്ന് വീടുകളിലെ 12 ആടുകള്‍ക്കാണ്. ശരീരത്തില്‍ വൃണങ്ങള്‍ കാണപ്പെടുന്നതാണ് രോഗത്തിന്റെ ലക്ഷണം.  പുന്നയൂര്‍ പഞ്ചായത്ത് മൃഗഡോക്ടറെത്തി കുത്തിവെക്കാനുള്ള മരുന്ന് നല്‍കിയതായി ബാദുഷ പറഞ്ഞു. എന്നാല്‍ രോഗപ്രതിരോധത്തിന്റെ കാര്യത്തില്‍ തീരുമാനമൊന്നുമില്ലാത്തത് പ്രദേശത്തെ ആട് വളര്‍ത്തുന്നവരില്‍ ആശങ്കയുണ്ടാക്കുന്നു.
 പുന്നയൂര്‍ പഞ്ചായത്ത് തീരമേഖലയില്‍ അര്‍ബുദം പടരുന്ന വാര്‍ത്തക്കിടയിലാണ് ആടുകളിലെ വൈറസ് രോഗബാധ പുറത്ത് വരുന്നത്. അര്‍ബുദ രോഗം പടരുന്ന വാര്‍ത്ത  പുറത്ത് വന്ന് ഒന്നര മാസത്തിലേറെയായിട്ടും മേഖലയിലെ വെള്ളവും മണ്ണും പരിശോധിക്കാന്‍ പഞ്ചായത്ത്, ആരോഗ്യ അധികൃതര്‍ തയ്യാറായിട്ടില്ല.