ആലപ്പുഴ: ചരക്ക് വാഹന പണിമുടക്ക് ഒത്തുതീര്‍പ്പാക്കണമെന്ന് വ്യാപാരി വ്യവസായി ഏകോപന സമിതി ആവശ്യപ്പെട്ടു. നിത്യോപയോഗ സാധനങ്ങളുടെയും പച്ചക്കറികളുടെയും വില ഉയര്‍ന്ന് നില്‍ക്കുന്ന സാഹചര്യത്തില്‍ ചരക്ക് വാഹനങ്ങളുടെ സമരം തുടര്‍ന്നാല്‍ വീണ്ടും വിലക്കയറ്റം വര്‍ദ്ധിക്കാനിടയാകും. കൂടാതെ ചില സാധനങ്ങള്‍ക്ക് മാര്‍ക്കറ്റുകളില്‍ ക്ഷാമവും നേരിടും. അതിനാല്‍ സര്‍ക്കര്‍ എത്രയും വേഗം പണിമുടക്ക് ഒത്തുതീര്‍പ്പാക്കാന്‍ വേണ്ട നടപടി സ്വീകരിക്കണമെന്ന് വ്യാപാരി വ്യവസായി ഏകോപന സമിതി ജില്ലാ പ്രസിഡന്റ് രാജുഅപ്‌സര, ജനറല്‍ സെക്രട്ടറി വി.സബില്‍രാജ്, വൈസ് പ്രസിഡന്റ് കെ.എസ്.മുഹമ്മദ് ട്രഷറര്‍ ജേക്കബ് ജോണ്‍ എന്നിവര്‍ ഒരു പ്രസ്താവനയില്‍ ആവശ്യപ്പെട്ടു.