ധാക്ക: ബംഗ്ലാദേശിലെ ധാക്കയില്‍ പൊലിസുകാര്‍ ഉള്‍പ്പെടെ 22 പേര്‍ കൊല്ലപ്പെട്ട ഭീകരാക്രമണത്തിനു പിന്നില്‍ ഭരണകക്ഷിയായ അവാമിലീഗ് നേതാവിന്റെ മകനും ഉള്‍പ്പെട്ടതായി റിപ്പോര്‍ട്ടുകള്‍.
പാര്‍ട്ടിയുടെ ധാക്ക സിറ്റി ഘടകത്തിന്റെ നേതാവും ബംഗ്ലാദേശ് ഒളിംപിക് അസോസിയേഷന്‍ ഡെപ്യൂട്ടി ജനറല്‍ സെക്രട്ടറിയുമായിരുന്ന ഇംതിയാസ് ഖാന്‍ ബാബുലിന്റെ മകന്‍ റോഹന്‍ ഇബ്‌നി ഇംതിയാസ് അക്രമി സംഘത്തിലുണ്ടായിരുന്നെന്ന വിവരമാണ് പുറത്തുവരുന്നത്. തന്റെ മകനെ കാണാനില്ലെന്നു കാണിച്ച് ഇംതിയാസ് ഖാന്‍ കഴിഞ്ഞ ജനുവരി നാലിന് പൊലിസില്‍ പരാതി നല്‍കിയിരുന്നു.
ഫേസ്ബുക്കിലും മറ്റും വന്ന ചിത്രങ്ങളിലൂടെയാണ് അക്രമികളിലൊരാള്‍ റോഹന്‍ ആണെന്നു തിരിച്ചറിഞ്ഞതെന്ന് അവാമി ലീഗ് ധാക്കാ സിറ്റി കമ്മിറ്റി മുന്‍ വൈസ്പ്രസിഡന്റ് മുകുള്‍ചൗധരി പറഞ്ഞു. ധാക്കയിലെ സമ്പന്നകുടുംബങ്ങളിലെ കുട്ടികള്‍ പഠിക്കുന്ന വിദ്യാലയത്തില്‍ ആണ് റോഹന്‍ പഠിച്ചത്. ഇതേ വിദ്യാലയത്തില്‍ അധ്യാപികയായിരുന്നു റോഹന്റെ മാതാവ്.
കഫേയില്‍ അക്രമം നടത്തിയവര്‍ ഇന്റെര്‍നെറ്റ് വഴി പുറത്തുവിട്ട ചിത്രങ്ങളില്‍ നിന്ന് ഇയാളെ തിരിച്ചറിഞ്ഞ സുഹൃത്തുകള്‍ മാതാപിതാക്കള്‍ക്കൊപ്പമുള്ള റോഹന്റെ ചിത്രം സോഷ്യല്‍മീഡിയയില്‍ പോസ്റ്റ് ചെയ്യുകയായിരുന്നു.
അതേസമയം കഫേയില്‍ ആക്രമണം നടത്തിയ ആറു തീവ്രവാദികളെ കൊലപ്പെടുത്തുകയും ഒരാളെ ജീവനോടെ പിടികൂടുകയും ചെയ്തതായി സൈന്യം വെളിപ്പെടുത്തിയിരുന്നു. അഞ്ച് തീവ്രവാദികളുടെ മൃതശരീരങ്ങളുടെ ഫോട്ടോകളും പൊലിസ് പുറത്തുവിട്ടിരുന്നു. എന്നാല്‍ ഇതില്‍ റോഹന്റെ ശരീരത്തിന്റെ ചിത്രം ഇല്ലായിരുന്നുവെന്ന് ബന്ധുക്കള്‍ പറഞ്ഞു.
പുറത്തുവിട്ട ചിത്രത്തിലുള്ള അഞ്ചുപേര്‍ തീവ്രവാദ സംഘടനയായ ജമാ അത്ത് ഉല്‍ മുജാഹിദിനിലെ അംഗങ്ങള്‍ ആണെന്നും പൊലിസ് ഇവര്‍ക്കായി തിരച്ചില്‍ നടത്തിവരികയായിരുന്നുവെന്നും പൊലിസ് ഇന്‍സ്‌പെക്ടര്‍ ജനറല്‍ സഹിദുല്‍ ഹക്ക് പറഞ്ഞു. റോഹന്റെ ചിത്രങ്ങള്‍ പുറത്തുവന്നതു മുതല്‍ പിതാവായ ഇംതിയാസ് ഖാന്‍ ബാബുലിനെ ബന്ധപ്പെടാന്‍ ശ്രമിച്ചെങ്കിലും സാധിച്ചില്ലെന്ന് അവാമി ലീഗ് ധാക്കാ സിറ്റി കമ്മിറ്റി മുന്‍ വൈസ് പ്രസിഡന്റ് മുകുള്‍ ചൗധരിയും വ്യക്തമാക്കി.