മലപ്പുറം: ജിഷ്ണുവിന്റെ മാതാപിതാക്കളെ അറസ്റ്റ് ചെയ്ത പൊലിസ് നടപടിയില്‍ പ്രതിഷേധിച്ച് മലപ്പുറത്ത് കെ.എസ്.യു നടത്തിയ മാര്‍ച്ചില്‍ സംഘര്‍ഷം. വൈകിട്ട് മൂന്നരയോടെ മലപ്പുറം എസ്.പി ഓഫിസിലേക്ക് നടത്തിയ മാര്‍ച്ചാണ് സംഘര്‍ഷത്തില്‍ കലാശിച്ചത്.
മാര്‍ച്ചിന്റെ ഉദ്ഘാടനം കഴിഞ്ഞതിനു ശേഷം പ്രവര്‍ത്തകര്‍ ബാരിക്കേഡ് ചാടിക്കടന്നതിനെ തുടര്‍ന്നാണ് സംഘര്‍ഷമുണ്ടായത്. സംഘര്‍ഷത്തില്‍ പി.സി വിഷ്ണുനാഥ് എം.എല്‍.എ, കെ.എസ്.യു സംസ്ഥാന പ്രസിഡന്റ് കെ.എസ് അഭിജിത്ത്, പി.റിന്‍ഷാദ്, മനീഷ് എടപ്പാള്‍, സിദ്ദീഖ് പന്താവൂര്‍, റിയാസ് മുക്കോളി എന്നിവര്‍ക്ക് പരുക്കേറ്റു. പരുക്കേറ്റവരെ മലപ്പുറം താലൂക്ക് ആശുപത്രിയില്‍ മുന്‍മുഖ്യമന്ത്രി ഉമ്മന്‍ചാണ്ടി സന്ദര്‍ശിച്ചു.
സമാധാനപരമായി സമരം ചെയ്യുന്ന പ്രവര്‍ത്തകരെ അടിച്ചൊതുക്കാനാണ് ശ്രമിക്കുന്നതെങ്കില്‍ ശക്തമായി നേരിടുമെന്ന് അദ്ദേഹം പറഞ്ഞു.