കുച്ചിങ്: മലേഷ്യന്‍ ഓപണ്‍ ബാഡ്മിന്റണ്‍ സൂപ്പര്‍ സീരീസില്‍ ഇന്ത്യന്‍ താരങ്ങള്‍ക്ക് കനത്ത തിരിച്ചടി. സൂപ്പര്‍ താരങ്ങളായ പി.വി സിന്ധു, സൈന നേഹ്‌വാള്‍ എന്നിവര്‍ ആദ്യ റൗണ്ടില്‍ തോറ്റു പുറത്തായി.
പുരുഷ വിഭാഗത്തില്‍ അജയ് ജയറാം രണ്ടാം റൗണ്ടില്‍ കടന്നതാണ് ഇന്ത്യക്ക് ആശ്വാസം നല്‍കുന്നത്.
ആറാം സീഡും ഒളിംപിക് വെള്ള മെഡല്‍ ജേതാവുമായി സിന്ധു ലോക 13ാം നമ്പര്‍ താരം ഷെന്‍ യുഫിയോടാണ് പരാജയപ്പെട്ടത്.
സ്‌കോര്‍ 21-18, 19-21, 17-21.  ആദ്യ സെറ്റില്‍ ഇഞ്ചോടിഞ്ച് പോരാടിയാണ് സിന്ധു സെറ്റ് വിട്ടുകൊടുത്തത്. രണ്ടാം സെറ്റില്‍ ചൈനീസ് താരത്തെ മറികടന്ന സിന്ധു  സെറ്റ് സ്വന്തമാക്കി. നിര്‍ണായകമായ മൂന്നാം സെറ്റില്‍ സിന്ധുവിന് മികവിലേക്കുയരാന്‍ സാധിച്ചില്ല.
അതേസമയം സൈന ലോക നാലാം നമ്പര്‍ താരം ജപ്പാന്റെ അകാനെ യമാഗുച്ചിയോടാണ് പരാജയപ്പെട്ടത്. സ്‌കോര്‍ 19-21, 21-13, 21-15. ആദ്യ സെറ്റ് സ്വന്തമാക്കിയ ശേഷമായിരുന്നു താരം മത്സരം നഷ്ടപ്പെടുത്തിയത്.
പുരുഷ വിഭാഗം ഡബിള്‍സില്‍ മനു അത്രി- സുമീത് റെഡ്ഡി സഖ്യം പുറത്തായി. ചൈനീസ് തായ്‌പേയ് ജോഡി ലിയാവോ കുവാന്‍ ഹാവോ-ലു ചിയ പിന്‍ സഖ്യത്തോടാണ് പരാജയപ്പെട്ടത്.
സ്‌കോര്‍ 21-18, 18-21, 17-21. സിംഗിള്‍സില്‍ അജയ് ജയറാം ചൈനയുടെ ക്വാവോ ബിന്നിനെയാണ് വീഴ്ത്തിയത്. സ്‌കോര്‍ 21-11, 21-8.