തലശ്ശേരി: കൊളശ്ശേരി അമ്പാടിമുക്കില്‍ ആര്‍.എസ്.എസ് പ്രവര്‍ത്തകന്റെ വീടിന് നേരെ ബോംബേറ്. അമ്പാടിമുക്കിലെ ശരണിന്റെ വീടിന് നേരെ ഇന്നലെ പുലര്‍ച്ചെ 5.10ഓടെയാണ് ബോംബേറുണ്ടായത്. ബൈക്കിലെത്തിയ സംഘമാണ് അക്രമം നടത്തിയതെന്നാണ് പരാതി. ബോംബേറ് നടക്കുമ്പോള്‍ ശരണ്‍ എറണാകുളത്തായിരുന്നു. പിതാവ് അജിത്ത്കുമാറും ബന്ധുക്കളും വീട് പൂട്ടി സമീപത്തെ ക്ഷേത്രത്തില്‍ ഉത്സവത്തിന് പോയതായിരുന്നു. വീടിന്റെ ഓടുകളും മറ്റും ബോംബേറില്‍ തകര്‍ന്നു. സി.പി.എം പ്രവര്‍ത്തകരാണ് സംഭവത്തിന് പിന്നിലെന്ന് ആര്‍.എസ്.എസ് ആരോപിച്ചു. തലശ്ശേരി സി.ഐ പ്രദീപന്‍ കണ്ണിപ്പൊയിലിന്റെ നേതൃത്വത്തില്‍ പൊലിസ് സ്ഥലത്തെത്തി പരിശോധന നടത്തി. നേരത്തെ സി.പി.എം-ബി.ജെ.പി സംഘര്‍ഷം ഉടലെടുത്ത പ്രദേശമാണ് അമ്പാടിമുക്ക്.