തിരുവനന്തപുരം:ആധുനിക കേരളത്തിന്റെ പുരോഗതി മുന്നില്‍ കണ്ട് ഭാവനാസമ്പന്നമായി പ്രവര്‍ത്തിച്ച വ്യക്തിയായിരുന്നു ലീഡര്‍ കെ.കരുണാകരനെന്ന് കെ.പി.സി.സി പ്രസിഡന്റ് വി.എം.സുധീരന്‍. കെ.കരുണാകരന്റെ 98ാം ജന്മദിനാഘോഷ പരിപാടിയില്‍ അധ്യക്ഷത വഹിച്ച് സംസാരിക്കുകയായിരുന്നു സുധീരന്‍. രാഷ്ട്രീയരംഗത്ത് സമാനതകളില്ലാത്ത പ്രവര്‍ത്തനപാരമ്പര്യമാണ് ലീഡറുടേത്. മുനിസിപ്പല്‍ കൗണ്‍സില്‍ മുതല്‍ പാര്‍ലമെന്റ് വരെയുള്ള എല്ലാ നിയമനിര്‍മാണസഭകളിലും അംഗമാകാന്‍ അവസരം ലഭിച്ച വ്യക്തിയായിരുന്നു അദ്ദേഹം. 

പ്രായോഗികരാഷ്ട്രീയത്തില്‍ കരുണാകരനെ വെല്ലാന്‍ ആരുമില്ലെന്ന് സമ്മേളനം ഉദ്ഘാടനം ചെയ്ത മുന്‍മുഖ്യമന്ത്രി ഉമ്മന്‍ചാണ്ടി പറഞ്ഞു. ഒരുമിച്ചുനിന്നു പ്രയത്‌നിച്ചാല്‍ നേടാന്‍ പറ്റാത്തതായി ഒന്നുമില്ലെന്ന് കരുണാകരന്‍ സ്വന്തം ജീവിതത്തിലൂടെ കാണിച്ചുതന്നിട്ടുണ്ട്. കരുണാകരന്റെ സ്മരണ എല്ലാവര്‍ക്കും ശക്തിയും ആത്മവിശ്വാസവും പകരുന്നതാണെന്നും ഉമ്മന്‍ചാണ്ടി പറഞ്ഞു. കോണ്‍ഗ്രസിന്റെ ശക്തനായ നേതാവായിരുന്നു ലീഡറെന്നു പ്രതിപക്ഷനേതാവ് രമേശ് ചെന്നിത്തല പറഞ്ഞു. എല്ലാ പ്രതിസന്ധികളിലും പാര്‍ട്ടിയെ ആത്മവിശ്വാസത്തോടെ മുന്നോട്ടുനയിക്കാന്‍ അദ്ദേഹത്തിനു കഴിഞ്ഞു. നരേന്ദ്രമോദിയുടെ ഭരണം രാജ്യത്തെ വലിയ തകര്‍ച്ചയിലേക്കും വര്‍ഗീയധ്രുവീകരണത്തിലേക്കും തള്ളിവിടുന്നു. കോര്‍പറേറ്റുകള്‍ക്കു വേണ്ടിയാണു മോദി ഭരണം നടത്തുന്നതെന്നും പ്രതിപക്ഷനേതാവ് ആരോപിച്ചു.