തിരുവനന്തപുരം: കൊവിഡ് 19 ടെസ്റ്റുകളുടെ എണ്ണം കൂട്ടാന്‍ കളക്ടര്‍മാര്‍ക്ക് നിര്‍ദ്ദേശം നല്‍കി മുഖ്യമന്ത്രി പിണറായി വിജയന്‍. ജില്ലാ കളക്ടര്‍മാര്‍, പൊലിസ് മേധാവികള്‍, മെഡിക്കല്‍ ഓഫിസര്‍മാര്‍ എന്നിവരുമായി മുഖ്യമന്ത്രി നടത്തിയ വീഡിയോ കോണ്‍ഫറന്‍സിലാണ് നിര്‍ദേശം നല്‍കിയത്.

തമിഴ്‌നാട്, കര്‍ണാടക എന്നീ അയല്‍സംസ്ഥാനങ്ങളില്‍ നിന്ന് ആരും ഊടുവഴികളിലൂടെയും കാടിനുള്ളിലൂടെയും കേരളത്തിലേക്ക് എത്തുന്നില്ലെന്ന് ഉറപ്പുവരുത്തണം. പ്രവാസികള്‍ മടങ്ങിയെത്തുമ്പോള്‍ റിവേഴ്‌സ് ക്വാറന്റൈന്‍ ഉറപ്പാക്കണം. ഇതിനായി പ്രത്യേകം ശുചിമുറികളുള്ള താമസസൗകര്യം കണ്ടെത്തണം. റെഡ്‌സോണ്‍, ഹോട്‌സ്‌പോട്ട് പ്രദേശങ്ങളില്‍ എല്ലാവര്‍ക്കും ഭക്ഷണം നല്‍കണം എന്നിങ്ങനെയാണ് നിര്‍ദ്ദേശങ്ങള്‍.

കഴിഞ്ഞ ഒരാഴ്ചത്തെ കണക്ക് പരിശോധിച്ചാല്‍ സംസ്ഥാനത്ത് പ്രതിദിനം 500 പരിശോധനകളാണ് നടത്തുന്നത്. പ്രതിദിനം 4000 പരിശോധനകള്‍ നടത്താനുള്ള സൗകര്യമാണ് കേരളത്തില്‍ ഉള്ളത്. രോഗലക്ഷണമില്ലാത്തവരിലും കൂടുതലായി പൊതുസമ്പര്‍ക്കം നടത്തുന്നവരെ പരിശോധിക്കാനും നിര്‍ദേശം നല്‍കിയിട്ടുണ്ട്.