പരപ്പനങ്ങാടി: തിരൂരങ്ങാടി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എം രാകേഷും സംഘവും വേങ്ങര, പര്‍പ്പൂര്‍ ഭാഗങ്ങളില്‍ നടത്തിയ റെയ്ഡില്‍ 130 ലിറ്റര്‍ വാഷും അഞ്ചു ലിറ്റര്‍ ചാരായവുംമറ്റു വാറ്റുപകരണങ്ങളും പിടിച്ചെടുത്തു. ഇറക്കത്തില്‍ കോളനിയില്‍ പുലര്‍ച്ചെ നടത്തിയ റെയ്ഡില്‍ അഞ്ചു ലിറ്റര്‍ ചാരായം കടത്തികൊണ്ടു വന്ന നാരായണന്‍ മകന്‍ സാമിനാഥനെതിരേ കേസെടുത്തു.
സമീപത്തെ തോട്ടിന്‍ കരയില്‍ തെരച്ചിലിലാണ് വാഷ് കണ്ടെത്തിയത്. ബീവറേജ്‌സ് ഔട്ടലറ്റുകള്‍ പൂട്ടിയതിനു ശേഷം വാറ്റ് തകൃതിയാക്കുകയായിരുന്നു.
രഹസ്യവിവരം ലഭിച്ചതിനെ തുടര്‍ന്നാണ് എക്‌സൈസ് പുലര്‍ച്ചെ റെയ്ഡ് നടത്തിയത്. റെയ്ഡില്‍ അസി. എക്‌സൈസ് ഇന്‍സ്‌പെക്ടര്‍ വി.പി ഭാസ്‌കരന്‍, പ്രിവ. ഓഫിസര്‍ സുര്‍ജിത്ത് സി.ഇ.ഒമാരായ അരവിന്ദന്‍, ജയ കൃഷ്ണന്‍, അജൂ, രജീഷ്, ചന്ദ്രമോഹന്‍ പങ്കെടുത്തു.