കൊച്ചി: മാര്‍ച്ച് 11 മുതല്‍ 25 വരെ അബൂദബിയില്‍ നടക്കുന്ന അന്താരാഷ്ട്ര സ്‌പെഷല്‍ ഒളിംപിക്‌സില്‍ പങ്കെടുക്കാന്‍ കേരളത്തില്‍നിന്ന് 27 കായിക താരങ്ങള്‍.

കേരളത്തിലെ വിവിധ സ്‌പെഷല്‍ സ്‌കൂളുകളില്‍ പരിശീലനം നേടുന്നവരില്‍ നിന്നാണ് 27പേരെ തിരഞ്ഞെടുത്തത്. ഇന്ന് ഡല്‍ഹിയിലേക്ക് പുറപ്പെടുന്ന താരങ്ങള്‍ മാര്‍ച്ച് എട്ടിന് അവിടെ നിന്ന് അബൂദബിയിലേക്ക് പുറപ്പെടും. അബൂദബിയിലെ സെയ്ദ് സ്‌പോര്‍ട്‌സ് സിറ്റിയില്‍ നടക്കുന്ന സ്‌പെഷല്‍ ഒളിംപിക്‌സില്‍ 192 രാജ്യങ്ങളില്‍ നിന്നായി 7500 കായിക താരങ്ങള്‍ പങ്കെടുക്കും. ഇന്ത്യയില്‍ നിന്ന് 17 ഇനങ്ങളിലായി 378 അംഗ ടീമാണ് പങ്കെടുക്കുന്നത്. കേരളത്തില്‍ നിന്നുള്ള ടീമിനെ കോട്ടയം മണ്ണയ്ക്കനാട് ഹോളിക്രോസ് സ്‌പെഷല്‍ സ്‌കൂള്‍ പ്രിന്‍സിപ്പല്‍ സിസ്റ്റര്‍ റാണി ജോയി നയിക്കും. കൂടാതെ മൂന്ന് പരിശീലകരും സംഘത്തിലുണ്ട്. വൈകിട്ട് ഏഴിന് നിസാമുദ്ധീന്‍ ട്രെയിനിലാണ് കേരള സംഘം ഡല്‍ഹിയിലേക്ക് പുറപ്പെടുക.