കാബൂള്‍: അഭൂതപൂര്‍വമായ നീക്കത്തില്‍ പെരുന്നാള്‍ദിനത്തില്‍ വെടിനിര്‍ത്തല്‍ കരാര്‍ ഒന്നിച്ചാഘോഷിച്ച് അഫ്ഗാനിസ്താന്‍ സൈനികരും താലിബാന്‍ തീവ്രവാദികളും. സൈനികരും താലിബാന്‍ തീവ്രവാദികളും ആലിംഗനം ചെയ്യുന്ന അപൂര്‍വ കാഴ്ചയ്ക്കാണ് ഇന്നലെ അഫ്ഗാന്‍ തലസ്ഥാനമായ കാബൂളും പരിസര പ്രദേശങ്ങളും സാക്ഷിയായത്. നഗരത്തിലെങ്ങും ആക്രമണങ്ങള്‍ ഒഴിഞ്ഞതിന്റെ ആഹ്ലാദാരവങ്ങളും കണ്ടു. പെരുന്നാളിനോടനുബന്ധിച്ചു മൂന്നു ദിവസത്തേക്കു വെടിനിര്‍ത്തല്‍ പ്രഖ്യാപിക്കുന്നതായി താലിബാന്‍ അറിയിച്ചിരുന്നു. നേരത്തെ, വെടിനിര്‍ത്താനുള്ള സര്‍ക്കാര്‍ ആഹ്വാനത്തെ തുടര്‍ന്നായിരുന്നു ഇത്.
പെരുന്നാള്‍ദിനമായ ഇന്നലെ താലിബാന്‍ നേതാക്കള്‍ ആഭ്യന്തര മന്ത്രി വായിസ് ബര്‍മാകുമായി അദ്ദേഹത്തിന്റെ വസതിയിലെത്തി കൂടിക്കാഴ്ച നടത്തി. വെടിനിര്‍ത്തല്‍ കുറച്ചു ദിവസത്തേക്കു കൂടി നീട്ടുമെന്ന് പ്രസിഡന്റ് അശ്‌റഫ് ഗനി അറിയിച്ചു. വെടിനിര്‍ത്തല്‍ രാജ്യത്തിന്റെ ദീര്‍ഘകാല സമാധാനത്തിലേക്കുള്ള വഴിയാകണമെന്ന് അദ്ദേഹം പറഞ്ഞു. ഇതിന് താലിബാന്‍ തയാറാകണമെന്നും ഗനി ആവശ്യപ്പെട്ടു.
തലസ്ഥാനമായ കാബൂളിനു പുറമെ കുന്ദുസ്, ഗസ്‌നി തുടങ്ങിയ നഗരങ്ങളിലെല്ലാം വെടിനിര്‍ത്തല്‍ പ്രഖ്യാപനത്തിന്റെ സന്തോഷപ്രകടനങ്ങള്‍ കാണാനായി. വിദൂരദേശങ്ങളില്‍നിന്നു വരെ നിരായുധരായ താലിബാന്‍ തീവ്രവാദികള്‍ പ്രഖ്യാപനം ആഘോഷിക്കാനായി തെരുവുകളിലെത്തി. സൈന്യവുമൊന്നിച്ചുള്ള ആഹ്ലാദത്തിന്റെ രംഗങ്ങള്‍ പ്രാദേശിക ചാനലുകള്‍ പുറത്തുവിട്ടു.
ഈ മാസം ആദ്യത്തിലാണ് താലിബാന്‍ നേതാക്കള്‍ വെടിനിര്‍ത്തല്‍ പ്രഖ്യാപിച്ചത്. അടുത്ത ബുധനാഴ്ച വരെ ഏകപക്ഷീയമായ വെടിനിര്‍ത്തല്‍ പ്രഖ്യാപനം ഇതിനു മുന്‍പ് സര്‍ക്കാര്‍ സൈന്യവും നടത്തിയിരുന്നു. 2001ലെ യു.എസ് അധിനിവേഷത്തിനു ശേഷം ഇതാദ്യമായാണ് താലിബാന്‍ വെടിനിര്‍ത്തലിനു സന്നദ്ധമാകുന്നത്. തീരുമാനത്തെ അമേരിക്കയടക്കമുള്ള രാജ്യങ്ങള്‍ സ്വാഗതം ചെയ്തിരുന്നു.