മലപ്പുറം: ഇനി അഞ്ചു ദിവസങ്ങള്‍ മാത്രം, മലപ്പുറത്ത് തെരഞ്ഞെടുപ്പ് പ്രചാരണം സജീവമാകുകയാണ്. പ്രചാരണച്ചൂടിനു കുളിരേകി ഇന്നലെ വൈകിട്ട് മഴയുമെത്തി. ഇടതു, വലതു മുന്നണികളിലെ നേതാക്കള്‍ തമ്പടിച്ചു പ്രചാരണം നടത്തുന്ന ജില്ലയില്‍ വോട്ടുപിടിക്കാന്‍ ബി.ജെ.പിയുടെ ന്യൂനപക്ഷ മുഖങ്ങള്‍ ഇന്നെത്തും.

സാധാരണ വിഷയങ്ങള്‍ക്കു പുറമേ വിഷ്ണു പ്രണോയ് മരിച്ചതുമായി ബന്ധപ്പെട്ടുണ്ടായ വിവാദങ്ങള്‍ പ്രതിപക്ഷം വിഷയമാക്കിയപ്പോള്‍ ഇതിലൊന്നും തൊടാതെയുള്ള പ്രചാരണ പരിപാടികളാണ് എല്‍.ഡി.എഫ് നടത്തിയത്. യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടിയുടെ രണ്ടാംഘട്ട പര്യടനം ഇന്നലെ രാവിലെ വേങ്ങരയിലും ഉച്ചയ്ക്കു ശേഷം വള്ളിക്കുന്നിലുമാണ് നടന്നത്. പാക്കടപ്പുറായയില്‍ ഫോര്‍വേഡ് ബ്ലോക്ക് ദേശീയ ജനറല്‍ സെക്രട്ടറി ജി. ദേവരാജ്ന്‍ ഉദ്ഘാടനം ചെയ്തു. വിവിധ സ്ഥലങ്ങളിലെ പര്യടനത്തിനു ശേഷം ചേളാരിയില്‍ സമാപിച്ചു.

എല്‍.ഡി.എഫ് സ്ഥാനാര്‍ഥി എം.ബി ഫൈസല്‍ ഇന്നലെ കൊണ്ടോട്ടി മണ്ഡലത്തിലാണ് പ്രചാരണം നടത്തിയത്. എന്‍.ഡി.എ സ്ഥാനാര്‍ഥി എന്‍. ശ്രീപ്രകാശ് ഇന്നലെ മഞ്ചേരി മണ്ഡലത്തിലെ എടപ്പറ്റയില്‍നിന്നു പ്രചാരണം ആരംഭിച്ചു.

പി.സി തോമസ് ഉദ്ഘാടനം ചെയ്തു. മഞ്ചേരി ടൗണില്‍ സമാപന സമ്മേളനം അഡ്വ. പി.എസ്.ശ്രീധരന്‍ പിള്ള ഉദ്ഘാടനം ചെയ്തു.