തളിപ്പറമ്പ്: പാണപ്പുഴയില്‍ കറവപശുവിനെ തെരുവുനായ്ക്കള്‍ കടിച്ചുകൊന്നു. ചിറക്കര ബാലന്റെ പശുവിനെയാണ് ഇന്നലെ രാവിലെ ഒന്‍പതോടെ പത്തോളം തെരുവ് നായ്ക്കള്‍ ചേര്‍ന്ന് കടിച്ചുകൊന്നത്.
വീട്ടിനടുത്ത വയലില്‍ മേയാന്‍ വിട്ടതായിരുന്നു. ബാലന്റെ ഭാര്യ വിളിച്ചുപറഞ്ഞതനുസരിച്ച് ബാലന്‍ സ്ഥലത്തെത്തുമ്പോഴേക്കും പശു ചത്തിരുന്നു.
പ്രദേശത്ത് തെരുവുനായ്ക്കളുടെ ശല്യം രൂക്ഷമായിരിക്കുകയാണ്. നാട്ടുകാര്‍ നിരവധി അപേക്ഷകള്‍ പഞ്ചായത്ത് അധികൃതര്‍ക്ക് നല്‍കിയെങ്കിലും നടപടി സ്വീകരിച്ചില്ലെന്നും ആക്ഷേപമുണ്ട്.