വളാഞ്ചേരി: പെരുന്നാള്‍ ദിനത്തില്‍ നഗരത്തിലെ ഓട്ടോകള്‍ മിന്നല്‍ പണിമുടക്ക് നടത്തിയത് യാത്രക്കാരെ വലച്ചു. ടൗണിലെ ട്രാഫിക് പരിഷ്‌ക്കരണത്തിന്റെ ഭാഗമായി വളാഞ്ചേരി തിരൂര്‍ റോഡരികിലെ ഓട്ടോസ്റ്റാന്‍ഡ് മാറ്റാനെത്തിയ പൊലിസിന്റെ നടപടിയില്‍ പ്രതിഷേധിച്ചാണ് ടൗണിലെ ഓട്ടോറിക്ഷ തൊഴിലാളികള്‍ മിന്നല്‍ പണിമുടക്ക് നടത്തിയത്. വെള്ളിയാഴ്ച രാവിലെയാണ് പ്രശ്‌നങ്ങളുടെ തുടക്കം.
വളാഞ്ചേരി എസ്.എച്ച്.ഒയുടെ നേതൃത്വത്തില്‍ എത്തിയ പൊലിസ് സംഘം തിരൂര്‍ റോഡരികില്‍ പാര്‍ക്ക് ചെയ്തിരുന്ന മുപ്പതോളം ഓട്ടോറിക്ഷകള്‍ എടുത്തുമാറ്റണമെന്ന് ആവശ്യപ്പെടുകയായിരുന്നു. എന്നാല്‍ തൊഴിലാളി പ്രതിനിധികളുമായി കൂടിയാലോചിക്കാതെ ഏകപക്ഷീയമായാണ് പൊലിസ് നടപടിയെന്നാരോപിച്ചാണ്് ഓട്ടോ തൊഴിലാളികള്‍ മിന്നല്‍ പണിമുടക്കിലേക്ക് നീങ്ങിയത്. ഇതോടെ പതിനൊന്നോടെ ടൗണില്‍ ഓട്ടോറിക്ഷകള്‍ സര്‍വിസ് നിര്‍ത്തിവച്ചു. പെരുന്നാള്‍ ദിനമായതിനാല്‍ ബസ് സര്‍വിസുകളും കുറവായിരുന്നു, ഇത് പൊതുജനത്തെ ഏറെ പ്രതികൂലമായി ബാധിച്ചു. വിവിധ ആവശ്യങ്ങള്‍ക്കായി ടൗണിലെത്തിയ രോഗികളും വൃദ്ധരും സ്ത്രീകളും കുട്ടികളുമടങ്ങുന്ന യാത്രക്കാര്‍ പെരുവഴിയിലായി. നഗരത്തിലെ വര്‍ധിച്ചുവരുന്ന ഗതാഗതപ്രശ്‌നങ്ങള്‍ പരിഹരിക്കുന്നതിനും അനധികൃത പാര്‍ക്കിങും കച്ചവടവും നിയന്ത്രിക്കുന്നതിനും നഗരസഭയില്‍ ചേര്‍ന്ന നഗരസഭാ അധികൃതര്‍, വ്യാപാരികള്‍, ബസ് ഉടമ പ്രതിനിധികള്‍ പൊലിസ് ഉദ്യോഗസ്ഥര്‍ എന്നിവരുടെ സംയുക്തയോഗത്തില്‍ തീരുമാനിച്ചിരുന്നു.ഇതേ തുടര്‍ന്നാണ് പൊലിസ് സംഘം തിരൂര്‍ റോഡരികിലെ ഓട്ടോസ്റ്റാന്‍ഡ് മാറ്റാനെത്തിയത്. പണിമുടക്കിയ തൊഴിലാളികള്‍ ടൗണില്‍ പ്രതിഷേധ പ്രകടനം നടത്തി.
മോട്ടോര്‍ കോഡിനേഷന്‍ ചെയര്‍മാന്‍ മുഹമ്മദലി നീറ്റുകാട്ടില്‍, കണ്‍വീനര്‍ എം. ജയകുമാര്‍, കെ.എം ഫിറോസ് ബാബു, ബാലകൃഷ്ണന്‍, ഇ.പി മുഹമ്മദലി, ഷാജി, മുഹമ്മദ് കുട്ടി കരേക്കാട്, വി.പി ഹംസ, സി. സുരേഷ്, മുനീര്‍ നേതൃത്വം നല്‍കി.