മുക്കം: പ്രളയാനന്തര പുനര്‍നിര്‍മാണ പ്രവര്‍ത്തനങ്ങള്‍ക്കും ശുചിത്വ, പാര്‍പ്പിട മേഖലകള്‍ക്കും ഊന്നല്‍ നല്‍കി മുക്കം നഗരസഭയുടെ 2019- 20 വാര്‍ഷിക ബജറ്റ് അവതരിപ്പിച്ചു. ആകെ 78. 92 കോടി രൂപ വരവും 78. 44 കോടി രൂപ ചിലവും ഉള്‍പ്പെടെ 27 ലക്ഷം രൂപയുടെ മിച്ച ബജറ്റാണ് നഗരസഭ ഡെപ്യൂട്ടി ചെയര്‍പേഴ്‌സണ്‍ ഹരിത മോയിന്‍കുട്ടി അവതരിപ്പിച്ചത്. സമ്പൂര്‍ണ ഭവന പദ്ധതിക്ക് 7.12 കോടി രൂപയും സമ്പൂര്‍ണ ശുചിത്വ പദ്ധതിക്ക് 2.79 കോടി രൂപയും ബജറ്റ് വകയിരുത്തി. പ്രളയാനന്തരം തകര്‍ന്ന റോഡുകളുടെയും മറ്റ് റോഡുകളുടെയും നിര്‍മാണ പ്രവര്‍ത്തികള്‍ക്കായി 6.57 കോടിരൂപയും അയ്യങ്കാളി തൊഴിലുറപ്പ് പദ്ധതിയുടെ വിവിധ പ്രവര്‍ത്തനങ്ങള്‍ക്ക് 14 കോടി രൂപയും ഹരിതസേന പ്രവര്‍ത്തനങ്ങള്‍ക്ക് 20 ലക്ഷം രൂപയും ക്ഷീരകര്‍ഷകര്‍ക്ക് മില്‍ക്ക് ഇന്‍സെന്റിവ് ഇനത്തില്‍ 12 ലക്ഷം രൂപയും അങ്കണവാടി പോഷക ആഹാരത്തിന് 37 ലക്ഷം രൂപയും ജലസംരക്ഷണ പ്രവര്‍ത്തനങ്ങള്‍ക്ക് 20 ലക്ഷം രൂപയും ഭവന പുനരുദ്ധാരണത്തിന് 67 ലക്ഷം രൂപയും വകയിരുത്തിയിട്ടുണ്ട്.