തിരുവനന്തപുരം: ഉള്‍നാടന്‍ കടലോര മത്സ്യകൃഷി വ്യാപിപ്പിക്കുമെന്ന് മന്ത്രി ജെ. മേഴ്‌സിക്കുട്ടിയമ്മ. വര്‍ക്കല, ഓടയം ഫിന്‍ഫിഷ് റയറിങ് യൂനിറ്റും കുട്ടികളുടെ പാര്‍ക്കും ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. പൊതുതാല്‍പര്യം സംരക്ഷിച്ച് കടലോര കാഴ്ചകള്‍ ഉപയോഗപ്പെടുത്തി ടൂറിസം മേഖലയെ ശാക്തീകരിക്കുമെന്നും മന്ത്രി പറഞ്ഞു.
ഫിഷറീസ് വകുപ്പിനു കീഴിലുള്ള കേരളാ ജലകൃഷി വികസന ഏജന്‍സിയുടെ (അഡാക്ക്) ഹാച്ചറി കോംപ്ലക്‌സിലാണ് 1.8 കോടി ചെലവിട്ട് തീരദേശ വികസന കോര്‍പറേഷന്‍ ഫിന്‍ഫിഷ് റയറിങ് യൂനിറ്റ് നിര്‍മിച്ചിരിക്കുന്നത്.
കരിമീന്‍ കുഞ്ഞുങ്ങളെ ടാങ്കിലേക്കു നിക്ഷേപിച്ചാണു മന്ത്രി ഉദ്ഘാടനം നിര്‍വഹിച്ചത്. പ്രതിവര്‍ഷം മൂന്നു ലക്ഷത്തോളം ഓരുജല മത്സ്യങ്ങളെ പരിപാലിക്കാനുള്ള സൗകര്യം ഇവിടെയുണ്ട്. പദ്ധതിയിലൂടെ ഓരുജല കര്‍ഷകര്‍ക്കു ഗുണനിലവാരമുള്ള മത്സ്യവിത്തുകള്‍ ലഭ്യമാകും.
അലങ്കാര മത്സ്യങ്ങള്‍ വിസ്മയക്കാഴ്ചകള്‍ ഒരുക്കുന്ന അക്വേറിയം, 3 ഡി തിയറ്റര്‍ ഉള്‍പ്പെടെയുള്ള കുട്ടികളുടെ പാര്‍ക്ക് എന്നിവ നിരവധി തൊഴിലവസരങ്ങള്‍ക്കും വഴിയൊരുക്കും. പദ്ധതിയിലൂടെ പ്രദേശത്തെ വിനോദ സഞ്ചാര മേഖലയായി ഉയര്‍ത്താന്‍ സാധിക്കുമെന്ന് അധ്യക്ഷ പ്രസംഗത്തില്‍ വി. ജോയി എം.എല്‍.എ പറഞ്ഞു.
വര്‍ക്കല ബ്ലോക്ക് പഞ്ചായത്ത് പ്രസിഡന്റ് എം.കെ യൂസഫ്, ഗ്രാമ പഞ്ചായത്ത് പ്രസിഡന്റുമാര്‍, ജനപ്രതിനിധികള്‍, ഫിഷറീസ് ഡയറക്ടര്‍ എസ്. വെങ്കടേസപതി, നഗരസഭാ ചെയര്‍പേഴ്ന്‍ ബിന്ദു ഹരിദാസ്, കെ.സി.എ.ഡി.സി ചീഫ് എന്‍ജിനീയര്‍ ബി.ടി കൃഷ്ണന്‍, തീരദേശ വികസന കോര്‍പറേഷന്‍ ബോര്‍ഡ് അംഗം എഫ്. നഹാസ് പങ്കെടുത്തു.