നെടുമങ്ങാട്: പാഠ്യ-പാഠ്യേതര പ്രവര്‍ത്തനങ്ങളുടെ വേറിട്ട പരിപാടികളുമായി ആനാട് ഗവ.എല്‍.പി.എസിന്റെ വാര്‍ഷികാഘോഷം . പരീക്ഷാ തിരക്കുകളെല്ലാം കഴിഞ്ഞ് അവധിക്കാലാരംഭത്തില്‍ , കഴിഞ്ഞ നാലിന് സായാഹ്നത്തില്‍ എല്ലാ കുട്ടികളും കുടുംബാംഗങ്ങളും സ്‌കൂള്‍ വളപ്പില്‍ ഒത്തുകൂടി.
വൈകുന്നേരം അഞ്ചിന് പഞ്ചായത്ത് പ്രസിഡന്റ് ആനാട് സുരേഷ് ദീപം തെളിയിച്ചതോടെ ആഘോഷങ്ങള്‍ക്ക് തുടക്കമായി. ഗായകന്‍ പന്തളം ബാലന്റെ ഗാനാലാപനത്തോടെ കലാപരിപാടികള്‍ക്ക് തിരി തെളിഞ്ഞു.
 പാഠഭാഗങ്ങളെ ആസ്പദമാക്കി അധ്യാപകരും കുട്ടികളും ചേര്‍ന്ന് തയാറാക്കിയ സ്‌ക്കിറ്റുകള്‍, നാടകാവിഷ്‌ക്കാരങ്ങള്‍, കോറിയോഗ്രാഫി, ചൊല്‍ക്കാഴ്ച, കഥാപ്രസംഗം, സംഗീതാര്‍ച്ചന, നൃത്താവതരണം തുടങ്ങി വൈവിധ്യമാര്‍ന്ന കലാപ്രകടനങ്ങള്‍   നടന്നു.
 250ല്‍ അധികം കുട്ടികള്‍ സ്റ്റേജില്‍ പരിപാടികള്‍ അവതരിപ്പിച്ചു. സ്‌കൂളിലെ രണ്ടാംക്ലാസ് വിദ്യാര്‍ഥി ആര്യന്റെ സഹോദരന്റെ ചികിത്സാ സഹായമായ ആദ്യ ഗഡു 35000- രൂപ യോഗത്തില്‍ കൈമാറി.
പഞ്ചായത്ത് സ്റ്റാന്റിങ് കമ്മിറ്റി ചെയര്‍മാന്‍ അക്ബര്‍ ഷാന്‍, ഉപജില്ലാ വിദ്യാഭ്യാസ ഓഫിസര്‍ എം. രാജ്കുമാര്‍ വാര്‍ഡ് മെമ്പര്‍ സിന്ധു, ഹെഡ് മാസ്റ്റര്‍ ജി.വിജയന്‍ നായര്‍, സപ്തപുരം അപ്പുക്കുട്ടന്‍, കെ.പി. ഗിരികുമാര്‍, കെ.എല്‍. പ്രീതാദാസ്, പി.ടി.എ. പ്രസിഡന്റ് ആര്‍.പ്രേം രാജ് എന്നിവര്‍ പ്രവര്‍ത്തനങ്ങള്‍ക്ക് നേതൃത്വം നല്‍കി.