പയ്യോളി: മേലടി മാപ്പിള എല്‍.പി സ്‌കൂളിലെ ക്ലാസ് ലൈബ്രറിയിലേക്ക് 15,000 രൂപയുടെ പുസ്തകങ്ങള്‍ നല്‍കി പയ്യോളിയിലെ നൈറ്റ് ഓട്ടോ ഡ്രൈവേഴ്‌സ് മാതൃകയായി. ജീവിക്കാന്‍ വേണ്ടിയുള്ള കഠിനാധ്വാനത്തിനിടയിലും വിജ്ഞാനത്തെ സ്‌നേഹിക്കുന്ന മഹാമനസ്‌കരായ രാത്രി കാലങ്ങളില്‍ പൊതുജനങ്ങള്‍ക്ക് സേവനം ചെയ്യുന്ന ഓട്ടോ ഡ്രൈവര്‍മാരാണ് ഈ സ്തുത്യര്‍ഹ പ്രവര്‍ത്തനം നടത്തിയത്.
ചങ്ക് ബ്രോസ് എന്ന വാട്‌സ്ആപ്പ് കൂട്ടായ്മയിലൂടെ പണം സ്വരൂപിച്ചു കൊണ്ടാണ് വിദ്യാര്‍ഥികള്‍ക്കാവശ്യമായ പുസ്തകങ്ങള്‍ സ്വരൂപിച്ചത്.ഇസ്മത്ത് മേലടി, നവാസ്, അഫ്‌സല്‍ പി.എം, ഷഫീക്ക്, ജാബിര്‍ കെ.പി, നൗഫല്‍ ഒ.വി, നാസില്‍ പി.എം ചടങ്ങില്‍ സംബന്ധിച്ചു. സ്‌കൂള്‍ ഹെഡ്മിസ്ട്രസ്സ് പി.ഇ സര്‍വ മംഗള, പി.ടി.എ പ്രസിഡന്റ് മുഹമ്മദലി മാസ്റ്റര്‍ ചിറക്കര, ലൈബ്രേറിയന്‍ എ.വി റജുല പുസ്തകങ്ങള്‍ ഏറ്റുവാങ്ങി.