തിരുവനന്തപുരം: കൊവിഡ് പ്രതിസന്ധിക്കിടയിലും സെക്രട്ടറിയേറ്റിലെ വിവിധ വകുപ്പുകളിലും മേധാവികളുടെ മുറികളിലും എ.സി സ്ഥാപിച്ചതിനുള്ള പണം അനുവദിക്കുന്നത് തുടരുന്നു. മാര്‍ച്ച് മാസത്തില്‍ അനുവദിച്ചതിന് പുറമെ ഏപ്രില്‍ പകുതിവരെ മൂന്നര ലക്ഷത്തോളം രൂപയാണ് അനുവദിച്ചത്. മാര്‍ച്ച് മാസത്തില്‍ ഇത്തരത്തില്‍ 48,79,000 രൂപ അനുവദിച്ചിരുന്നു.
ജലവിഭവ, കോസ്റ്റല്‍ ആന്‍ഡ് ഇന്‍ലാന്‍ഡ് നാവിഗേഷന്‍, ഹൗസിങ് വകുപ്പുകളുടെ അഡിഷണല്‍ ചിഫ് സെക്രട്ടറിയുടെ ഓഫിസ് മുറിയില്‍ എ.സി സ്ഥാപിച്ചതിന് 1,42,000 രൂപയാണ് അനുവദിച്ചത്. വ്യവസായ വകുപ്പ് സെക്രട്ടറിയുടെ ഓഫിസില്‍ എ.സി സ്ഥാപിച്ചതിന് 70,000 രൂപയും വ്യവസായ വകുപ്പിലെ മൂന്ന് അണ്ടര്‍ സെക്രട്ടറിമാരുടെ മുറികളില്‍ എ.സി സ്ഥാപിച്ചതിന് 1,30,000 രൂപയും അനുവദിച്ചു. തദ്ദേശ സ്വയംഭരണ വകുപ്പ് പ്രിന്‍സിപ്പല്‍ സെക്രട്ടറിയുടെ ഓഫിസ് വൈദ്യുതീകരിച്ചതിന്മാത്രമായി 64,000 രൂപയാണ് അനുവദിച്ചിരിക്കുന്നത്.
മാര്‍ച്ച് മാസത്തില്‍ ഗതാഗത വകുപ്പ് മന്ത്രിയുടെ പ്രൈവറ്റ് സെക്രട്ടറിയുടെ ക്യാബിനില്‍ എ.സി സ്ഥാപിക്കാന്‍ 1,13,000 രൂപയും സ്റ്റേറ്റ് പ്രോട്ടോകോള്‍ ഓഫിസറുടെ ഓഫിസിലേക്ക് 49,359 രൂപ, പൊതുഭരണ വകുപ്പ് പ്രവര്‍ത്തിക്കുന്ന മുറിക്കായി 72,100 രൂപ, ആഭ്യന്തര വകുപ്പ് പ്രവര്‍ത്തിക്കുന്ന മുറിയിലേക്ക് 99,000 രൂപ, ഗതാഗത, മത്സ്യബന്ധന, റവന്യൂവകുപ്പ് പ്രിന്‍സിപ്പല്‍ സെക്രട്ടറിയുടെ ഓഫിസിലേക്ക് 69,000 രൂപ, പൊതുഭരണ വകുപ്പിന്റെ റെക്കോര്‍ഡ്‌സ് വിഭാഗത്തിലേക്ക് 77,000 രൂപയും അനുവദിച്ചിരുന്നു.
ടെന്‍ഡറുകള്‍ ഇല്ലാതെ എ.സി സ്ഥാപിച്ചതിനുശേഷമാണ് ഈ പണം കൈമാറുന്നത്. കൊല്ലം കേന്ദ്രമായി പ്രവര്‍ത്തിക്കുന്ന മാക്‌സല്‍ ഏജന്‍സിയാണ് ലക്ഷക്കണക്കിന് രൂപയുടെ ഈ പ്രവൃത്തികളെല്ലാം ടെന്‍ഡറില്ലാതെ ചെയ്യുന്നത്.