തിരുവനന്തപുരം: ക്യാംപ് ഫോളോവര്‍ ഡ്യൂട്ടിക്ക് നിയോഗിക്കപ്പെട്ട പൊലിസുകാരെ ഉന്നത പൊലിസ് ഉദ്യോഗസ്ഥര്‍ വീട്ടുജോലി ചെയ്യിപ്പിച്ച സംഭവത്തെ കുറിച്ച് അന്വേഷിക്കുമെന്ന് മുഖ്യമന്ത്രി പിണറായി വിജയന്‍. കെ.എസ് ശബരീനാഥന്റെ സബ്മിഷന് നിയമസഭയില്‍ മറുപടി പറയുകയായിരുന്നു മുഖ്യമന്ത്രി. കാലാകാലങ്ങളായി തുടരുന്ന ഈ രീതി പൂര്‍ണമായി ഇല്ലാതാക്കാനുള്ള എല്ലാ നടപടികളും സര്‍ക്കാര്‍ കൈക്കൊള്ളും. പൊലിസുകാരെ ദാസ്യപ്പണി ചെയ്യിക്കുന്നത് ഏത് ഉദ്യോഗസ്ഥനായാലും കര്‍ശന നടപടി ഉണ്ടാകും. പൊലിസ് സേനാംഗങ്ങളുടെ മനുഷ്യാവകാശം ലംഘിക്കുന്ന ഒരു നടപടിയും അനുവദിക്കില്ല. ബ്രിട്ടീഷുകാരുടെ കാലത്തെ ജീര്‍ണത ഇപ്പോഴും തുടരുന്നത് നിര്‍ഭാഗ്യകരമാണെന്നും മുഖ്യമന്ത്രി പറഞ്ഞു.