നരിക്കുനി: ദക്ഷിണേന്ത്യയിലെ പ്രമുഖ സിയാറത്ത് കേന്ദ്രമായ മടവൂര്‍ സി.എം മഖാമിലെ 28ാം ഉറൂസ് മുബാറക്കിന് തുടക്കമായി. ഇന്നലെ കാലത്ത് 9.30ന് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളുടെ നേതൃത്വത്തില്‍ നടന്ന മഖാം സിയാറത്തിന് ശേഷം സി.എം കുഞ്ഞിമാഹിന്‍ മുസ്‌ലിയാര്‍ കൊടിയുയര്‍ത്തി. തുടര്‍ന്ന് നടന്ന മൗലിദിന് ഒളവണ്ണ അബൂബക്കര്‍ ദാരിമി, എന്‍. അബ്ദുല്ല മുസ്‌ലിയാര്‍ നേതൃത്വം നല്‍കി. 10 മണിക്ക് നടന്ന ഹജ്ജ് പഠന ക്ലാസ് കെ.എം മുഹമ്മദ് മാസ്റ്ററുടെ അധ്യക്ഷതയില്‍ വി.എം ഉമ്മര്‍ മാസ്റ്റര്‍ ഉദ്ഘാടനം ചെയ്തു. ഷാനവാസ് കുറുമ്പൊയില്‍, ബുജൈര്‍ ദാരിമി, പി.പി അബ്ദുല്‍ ജലീല്‍ ബാഖവി, വി.സി റിയാസ്ഖാന്‍, മില്ലത്ത് ബഷീര്‍ തുടങ്ങിയവര്‍ സംബന്ധിച്ചു. വില്ല്യാപ്പള്ളി ഇബ്രാഹിം മുസ്‌ലിയാര്‍ ക്ലാസിന് നേതൃത്വം നല്‍കി. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി അനുഗ്രഹപ്രാര്‍ഥന നടത്തി. രാത്രി നടന്ന മജ്‌ലിസുന്നൂറും അനുസ്മരണവും കെ.പി മാമുഹാജിയുടെ അധ്യക്ഷതയില്‍ സയ്യിദ് നാസര്‍ ഹയ്യ് ശിഹാബ് തങ്ങള്‍ ഉദ്ഘാടനം ചെയ്തു. അബ്ദുല്‍ മജീദ് ബാഖവി കാസര്‍കോട് അനുസ്മരണ പ്രഭാഷണം നടത്തി. മാണിയൂര്‍ അഹമ്മദ് മുസ്‌ലിയാര്‍ മജ്‌ലിസുന്നൂറിന് നേതൃത്വം നല്‍കി. എ.വി അബ്ദുറഹിമാന്‍ മുസ്‌ലിയാര്‍, യൂസുഫ് ബാഖവി, അബ്ദുല്‍ ബാരി ബാഖവി, മൂത്താട്ട് അബ്ദുറഹിമാന്‍ മാസ്റ്റര്‍, യു. ശറഫുദ്ദീന്‍ മാസ്റ്റര്‍ സംബന്ധിച്ചു. ടി.പി.സി മുഹമ്മദ് കോയ ഫൈസി സ്വാഗതവും ഖത്തര്‍ അബു മൗലവി നന്ദിയും പറഞ്ഞു.