തൃശ്ശൂര്‍: പാഴായിയില്‍ നാലുവയസുകാരിയെ പുഴയിലെറിഞ്ഞുകൊന്ന കേസില്‍ കൂടുതല്‍ അന്വേഷണം നടത്താന്‍ തൃശൂര്‍ ജില്ലാ പ്രിന്‍സിപ്പല്‍ സെഷന്‍സ് ജഡ്ജി സോഫി തോമസ് ഉത്തരവിട്ടു.

കണ്ണൂര്‍ മട്ടന്നൂര്‍ നന്ദനത്തില്‍ രജിത് കുമാറിന്റെയും നീഷ്മയുടെയും മകള്‍ മേബയെയാണ് 2016 ഒക്ടോബര്‍ 13ന് പ്രതിയായ ഷൈലജ പുഴയിലെറിഞ്ഞ് കൊലപ്പെടുത്തിയത്. നീഷ്മയോടും വീട്ടുകാരോടുമുള്ള വൈരാഗ്യം തീര്‍ക്കാന്‍ സഹോദരന്‍ മരിച്ചതിന്റെ സഞ്ചയനത്തിനെത്തിയ പ്രതി ഷൈലജ മേബയെ മിഠായി നല്‍കാമെന്ന് പറഞ്ഞ് കൂട്ടിക്കൊണ്ടുപോയി പുഴയിലേക്ക് എറിഞ്ഞ് കൊലപ്പെടുത്തിയെന്നാണ് പുതുക്കാട് സര്‍ക്കിള്‍ ഇന്‍സ്‌പെക്ടര്‍ നല്‍കിയ കുറ്റപത്രത്തില്‍ പറയുന്നത്.
കേസിന്റെ വിചാരണ നടപടികള്‍ തൃശൂര്‍ ജില്ലാ കോടതിയില്‍ നടന്നുവരുന്നതിനിടെയാണ് കൂടുതല്‍ അന്വേഷണം നടത്തി വീണ്ടും കുറ്റപത്രം സമര്‍പ്പിക്കാന്‍ അനുമതി വേണമെന്ന് ആവശ്യപ്പെട്ട് ജില്ലാ പബ്ലിക് പ്രോസിക്യൂട്ടര്‍ അഡ്വ.കെ.ഡി ബാബു ഹരജി സമര്‍പ്പിച്ചത്.

തുടര്‍ന്ന് പ്രതിഭാഗത്തിന്റെയും, ജില്ലാ പബ്ലിക് പ്രോസിക്യൂട്ടറുടെയും വാദങ്ങള്‍ കേട്ടതിനുശേഷമാണ് കൂടുതല്‍ അന്വേഷണം നടത്തുന്നതിനും തെളിവുകള്‍ ശേഖരിക്കുന്നതിനും കോടതി ഉത്തരവിട്ടത്.