കൊച്ചി: കൊവിഡ് 19 ന്റെ പശ്ചാത്തലത്തില്‍ അധ്യായനം ആരംഭിക്കുന്നത് അനിശ്ചിതമായി നീണ്ടു പോകുമ്പോള്‍ സ്വകാര്യ അണ്‍-എയ്ഡഡ് സ്‌കൂളുകളില്‍ ജൂണ്‍ ആദ്യവാരം ഓണ്‍ലൈന്‍ ക്ലാസുകള്‍ ആരംഭിക്കാന്‍ തീരുമാനിച്ചു. കെ ജി മുതല്‍ ഹയര്‍സെക്കന്‍ഡറി വരെയുള്ള വിദ്യാര്‍ഥികള്‍ക്കാണ് ക്ലാസ് ആരംഭിക്കുക .മെയ്യ് രണ്ടാം വാരം മുതല്‍ അധ്യാപകര്‍ക്കായി പത്തുദിവസത്തെ ഓണ്‍ലൈന്‍ പരിശീലനം നല്‍കും.

നിലവിലെ കൊവിഡ്19 ഭീതി മറികടക്കാനാവുമെങ്കില്‍ ആഗസ്റ്റ് മുതല്‍ മാര്‍ച്ച് വരെയുള്ള എട്ടുമാസം പൊതു അവധി ദിവസങ്ങള്‍ വെട്ടിക്കുറച്ചും ശനിയാഴ്ചകള്‍ പ്രവര്‍ത്തി ദിവസമാക്കിയും 190 പ്രവര്‍ത്തി ദിവസമാക്കി അക്കാദമിക് കലണ്ടര്‍ തയ്യാറാക്കും.
സാമൂഹ്യ പരിഷ്‌ക്കര്‍ത്താക്കളുടെ ജയന്തി,സമാധി ദിനങ്ങള്‍ പ്രവര്‍ത്തി ദിവസം ആക്കും. ഓണം, ക്രിസ്തുമസ് അവധികള്‍ വെട്ടിച്ചുരുക്കിയും കൊവിഡ്19 സൃഷ്ടിച്ച പ്രതിസന്ധി വിദ്യാഭ്യാസ മേഖലയില്‍ പരിഹരിക്കാന്‍ ശ്രമിക്കുമെന്നും ആള്‍ കേരള സെല്‍ഫ് ഫിനാന്‍സിംഗ് സ്‌കൂള്‍ ഫെഡറേഷന്‍ സംസ്ഥാന പ്രസിഡന്റ് രാമദാസ് കതിരൂര്‍ അറിയിച്ചു