കഴക്കൂട്ടം: കഴക്കൂട്ടം മഹാദേവര്‍ ക്ഷേത്രത്തില്‍ നിര്‍മിക്കുന്ന സംസ്ഥാനത്തെ ആദ്യ ശബരിമല ഇടത്താവള സമുച്ചയത്തിന്റെ ആദ്യഘട്ട നിര്‍മാണോദ്ഘാടനം ഇന്നു നടക്കും. വൈകിട്ട് ആറിനു മന്ത്രി കടകംപള്ളി സരേന്ദ്രന്‍ ഉദ്ഘാടനം നിര്‍വഹിക്കും. മന്ത്രിയുടെ ശ്രമഫലമായാണു 10 കോടി രൂപ ചെലവഴിച്ച് സംസ്ഥാന സര്‍ക്കാര്‍ ഇടത്താവള സമുച്ചയം കഴക്കൂട്ടത്ത് നിര്‍മിക്കുന്നത്. വിശാലമായ അമിനിറ്റി സെന്റര്‍, 350 പേര്‍ക്ക് ഒരേ സമയം ഭക്ഷണം കഴിക്കാവുന്ന അന്നദാന മണ്ഡപം, വിരിപ്പന്തല്‍, 700 പേര്‍ക്ക് ഇരിക്കാവുന്ന ഓഡിറ്റോറിയം, ഓപണ്‍ സ്റ്റേജ്, ആധുനിക പാചകമുറി, ടോയ്‌ലറ്റ് സൗകര്യം തുടങ്ങിയവ ഇടത്താവള സമുച്ചയത്തിന്റെ ഭാഗമായി നിര്‍മിക്കും.
ശബരിമല ദര്‍ശനത്തിനുള്ള ഓണ്‍ലൈന്‍ ബുക്കിങ് കൗണ്ടര്‍, ഇന്റര്‍നെറ്റ് വൈ ഫൈ സംവിധാനം, ലോക്കര്‍ സൗകര്യം, ഭക്തര്‍ക്കാവശ്യമായ സാധനങ്ങള്‍ ലഭിക്കുന്ന അമിനിറ്റി സ്റ്റോര്‍ എന്നിവയും ഇടത്താവള സമുച്ചയത്തിലുണ്ടാകും. രണ്ടുനിലകളിലുള്ള പ്രധാന മന്ദിരത്തിനു 26,846 ചതുരശ്ര അടിയും ഓപണ്‍ എയര്‍ ഓഡിറ്റോറിയത്തിനു 6,800 ചതുരശ്ര അടിയും ടോയ്‌ലറ്റ് കോംപ്ലക്‌സിനു 850 ചതുരശ്ര അടിയും വിസ്തീര്‍ണമുണ്ടാകും.
ക്ഷേത്രക്കുളം നവീകരിക്കുന്നതിനു 46 ലക്ഷം രൂപ വിനിയോഗിക്കും. ക്ഷേത്രനിര്‍മിതിക്ക് അനുയോജ്യമായി പരമ്പരാഗത ശൈലിയിലുള്ള കെട്ടിട സമുച്ചയമാണു ക്ഷേത്ര മുറ്റത്ത് ഉയരുക. മനോഹരമായ പൂന്തോട്ടവും പുല്‍ത്തകിടിയും പദ്ധതിയുടെ ഭാഗമായി ഒരുക്കും. ടോയ്‌ലറ്റ് കോംപ്ലക്‌സ് ക്ഷേത്രമതിലിന് പുറത്തു പ്രത്യേകം പണി കഴിപ്പിക്കും. ഒരുലക്ഷം ലിറ്റര്‍ സംഭരണ ശേഷിയുള്ള ടാങ്കും നിര്‍മിക്കുന്നുണ്ട്.
മേയര്‍ അഡ്വ. വി.കെ പ്രശാന്ത്, തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് എ. പത്മകുമാര്‍, അഡ്വ. എം. രാജഗോപാലന്‍ നായര്‍, കെ.പി ശങ്കരദാസ് പങ്കെടുക്കും.