വടക്കഞ്ചേരി: കിഴക്കഞ്ചേരി കരുമനശേരി ഗ്രാമത്തിലെ പുഴക്കലിടത്തില്‍ രവിചന്ദ്രനും ഭാര്യ വിശാലാക്ഷി നേത്യാര്‍ക്കും വലിയ മോഹങ്ങളൊന്നുമില്ല. രോഗം തളര്‍ത്തുന്ന വേദനകളില്‍നിന്നു ചെറിയൊരു ആശ്വാസം നല്‍കണേയെന്നു മാത്രമാണ് ഇവരുടെ പ്രാര്‍ഥന.
പത്തുവര്‍ഷത്തോളമായി കാന്‍സര്‍ രോഗത്തിന്റെ പിടിയിലാണ് 61 വയസുള്ള വിശാലാക്ഷി നേത്യാര്‍.
ഭാര്യയെ പരിചരിച്ചും ചികിത്സയ്ക്കായി ഓടിനടന്നും 63-കാരനായ രവിചന്ദ്രനും ഇപ്പോള്‍ രോഗിയായി.
മനസും ശരീരവും തളര്‍ന്നു വിശാലാക്ഷിക്ക് രവിചന്ദ്രനും രവിചന്ദ്രന് വിശാലാക്ഷിയും കൂട്ടായി ഗ്രാമത്തില്‍ വാടകവീട്ടില്‍ കഴിയുകയാണ് മക്കളില്ലാത്ത ഈ ദമ്പതികള്‍. സ്വന്തമെന്നു പറയാന്‍ കുറേ രോഗങ്ങളും വേദനകളും മാത്രം.
വീടോ സ്ഥലമോ ഇനി ബാക്കിയില്ല. നാട്ടുകാരും പരിചയക്കാരും സമുദായവുമെല്ലാം നല്‍കിയ നിര്‍ലോഭമായ സഹായങ്ങള്‍ കൊണ്ടായിരുന്നു ഇതുവരെയുള്ള ചികിത്സാ ചെലവുകളും ജീവിതവും. ഇനിയും അവരെ ബുദ്ധിമുട്ടിക്കാനാകില്ലെന്ന് രവിചന്ദ്രന്‍ പറയുന്നു.
ദിവസവുമുള്ള മരുന്നിനുതന്നെ വലിയ തുക വേണം. ഓരോ നേരത്തെ ഭക്ഷണവും അയല്‍വാസികളുടെ കാരുണ്യത്തില്‍ മുന്നോട്ടുപോകുന്ന ഇവര്‍ക്കു മുടങ്ങാതെയുള്ള മരുന്നിനുതന്നെ വകയില്ല. പരാധീനതകള്‍ കുന്നുകൂടിയപ്പോള്‍ കിഴക്കഞ്ചേരി കോപ്പറേറ്റീവ് ബാങ്കിനുമുന്നിലുണ്ടായിരുന്ന പെട്ടിക്കട നടത്താന്‍ കഴിയാതായി.
കാന്‍സര്‍ രോഗികള്‍ക്കായി ലഭിച്ചിരുന്ന പെന്‍ഷനും ആറു മാസമായി ലഭിച്ചിട്ടില്ല.
ഭൂമിയും വീടിനുമായി പഞ്ചായത്തിലും മറ്റും പലതവണ അപേക്ഷ നല്‍കിയെങ്കിലും ആരും ഇവരുടെ ദൈന്യതയില്‍ കണ്ണുതുറന്നില്ല.
കഴിഞ്ഞദിവസം മന്ത്രി എ.കെ ബാലന്‍ വടക്കഞ്ചേരിയിലെത്തിയപ്പോള്‍ സഹായത്തിനു അപേക്ഷ നല്‍കാന്‍ തീരുമാനിച്ചതായിരുന്നു. അപേക്ഷയെല്ലാം എഴുതി ശരിയാക്കിയെങ്കിലും അന്നു ശ്വാസംമുട്ടും തളര്‍ച്ചയും കൂടി വടക്കഞ്ചേരിയിലെത്തി മന്ത്രിയെ കാണാനായില്ല. പലതവണ ഓപ്പറേഷന്‍ കഴിഞ്ഞ ഭാര്യയ്ക്ക് ഇനിയും ഓപ്പറേഷന്‍ വേണമെന്നാണ് ഡോക്ടര്‍മാര്‍ പറഞ്ഞിട്ടുള്ളത്. ഇതിന്റെ തീയതിയും അടുത്തുതുടങ്ങി. നല്ല മനസുള്ളവര്‍ സഹായിക്കാതെ ഇവര്‍ക്കിനി തുടര്‍ചികിത്സ സാധ്യമല്ല.
വിജയബാങ്ക് കിഴക്കഞ്ചേരി കുണ്ടുകാട് ശാഖയില്‍ രവിചന്ദ്രന്റെ പേരില്‍ ബാങ്ക് അക്കൗണ്ട് തുടങ്ങിയിട്ടുണ്ട്. 2016 0101 1004 192 എന്നതാണ് അക്കൗണ്ട് നമ്പര്‍. ഫോണ്‍: 9747 576 305.